जयकुमार गोरे यांचे जिल्ह्यासाठी योगदान काय : आ. रामराजे यांचा सवाल
टीम : धैर्य टाईम्स
माढा लोकसभा मतदारसंघाचे खासदार हे दिल्लीत सत्ताधारी खासदार आहेत तर आ.जयकुमार गोरे यांना सातारा जिल्ह्याचे अध्यक्ष केले आहे मात्र यांचे सातारा जिल्ह्यासाठी विकासाचे योगदान काय? असा सवाल विधान परिषदेचे मा. सभापती आ.रामराजे नाईक निंबाळकर यांनी केला आहे. ते विडणी येथे राष्ट्रवादी काँग्रेस पार्टी पुरस्कृत उत्तरेश्वर पॅनलच्या उमेदवारांच्या प्रचारार्थ कोपरा सभेत बोलत होते.
यावेळी व्यासपीठावर श्रीराम सहकारी साखर कारखान्याचे चेअरमन डॉ. बाळासाहेब शेंडे, डॉ. उत्तमराव शेंडे, श्रीराम सहकारी साखर कारखान्याचे संचालक हनुमंतराव अभंग, सोसायटीचे मा. चेअरमन सर्जेराव नाळे यांच्यासह माजी सरपंच माजी चेअरमन ज्येष्ठ कार्यकर्ते उपस्थित होते.
यावेळी बोलताना आ.रामराजे यांनी 30 वर्षाच्या सत्तेमध्ये धोम बलकवडीचा उल्लेख करतानाच फलटण तालुक्यातील श्रीराम सहकारी साखर कारखाना व फलटण शुगर वर्क्स या दोन्ही कारखान्यांना आपण ऊर्जित अवस्था प्राप्त करून दिली त्यामुळे आज शेतकऱ्यांना सुखाचे दिवस असल्याचे सांगताना हे दोन्ही कारखाने दुर्दैवाने बंद झाले असते तर शेतकऱ्यांवर आज काय वेळ आली असती? हा प्रश्न उपस्थित करतानाच राष्ट्रवादी काँग्रेस पक्ष विकासाला कमी पडणार नाही असे आश्वासन यावेळी आ. रामराजे यांनी दिले.
विडणी येथील ज्येष्ठ नेते डॉ. उत्तमराव शेंडे यांच्या राष्ट्रवादी काँग्रेस पक्ष प्रवेशाने विडणी येथील राष्ट्रवादीची ताकद वाढली असल्याने ही निवडणूक राष्ट्रवादी काँग्रेस पक्ष मोठ्या मताधिक्याने जिंकेल असा विश्वास यावेळी आ. रामराजे नाईक निंबाळकर यांनी व्यक्त केला.
श्रीराम सहकारी साखर कारखान्याचे चेअरमन डॉ.बाळासाहेब शेंडे, राष्ट्रवादी काँग्रेस पक्षामध्ये प्रवेश केलेले डॉ. उत्तमराव शेंडे विडणीचे सरपंच पदाचे उमेदवार सुरेश विठ्ठल नाळे यांच्यासह विडणीतील मान्यवरांनी आपले मनोगते यावेळी व्यक्त केली.
कार्यक्रमाचे प्रास्ताविक आणि सूत्रसंचालन विडणीचे मा. सरपंच शरदराव कोल्हे यांनी केले.
डॉ. उत्तमराव शेंडे यांचा राष्ट्रवादीत प्रवेश
राष्ट्रीय समाज पक्षाचे पश्चिम महाराष्ट्राचे मा. सचिव, विडणीतील ज्येष्ठ नेते डॉ. उत्तमराव शेंडे यांनी राष्ट्रवादी काँग्रेस पक्षाचे ज्येष्ठ नेते महाराष्ट्र विधान परिषदेचे मा. सभापती आ. रामराजे नाईक निंबाळकर यांच्या उपस्थितीत राष्ट्रवादी काँग्रेस पक्षात प्रवेश केला. विडणी येथील राष्ट्रवादी काँग्रेस पक्षाचे पारंपारिक प्रतिस्पर्धी म्हणून डॉक्टर उत्तमराव शेंडे हे होते. मात्र डॉ. उत्तमराव शेंडे यांचा राष्ट्रवादी काँग्रेस प्रवेशाने राष्ट्रवादीची ताकद वाढल्यास चर्चा विडणी येथे होत आहे.
संबंधित बातम्या
