सिद्धी अबॅकस अकॅडमीचा राज्यस्तरीय स्पर्धेत डंका ; १२३ विद्यार्थ्यांचा १०० टक्के निकाल

फलटण प्रतिनिधी : 

ॲडेलीले अबॅकस यांच्या वतीने पुणे येथील लोणी, काळभोर लॉन्स येथे नुकतीच राज्यस्तरीय अबॅकस स्पर्धा उत्साहात पार पडली. महाराष्ट्रातील विविध भागांतील विद्यार्थ्यांनी या स्पर्धेत सहभाग घेतला होता. फलटण येथील IPA फलटण सेंटरच्या सिद्धी अबॅकस अकॅडमीच्या तब्बल १२३ विद्यार्थ्यांनी या स्पर्धेत सहभाग नोंदविला.

या स्पर्धेत अकॅडमीच्या सर्व १२३ विद्यार्थ्यांनी यश संपादन करून १०० टक्के निकालाची नोंद केली. विशेष म्हणजे सर्व विद्यार्थी पहिल्या पाच क्रमांकांमध्ये स्थान मिळवून उत्तीर्ण झाले. विद्यार्थ्यांच्या या उल्लेखनीय कामगिरीबद्दल त्यांचे सर्वत्र कौतुक होत आहे.

स्पर्धेत विद्यार्थ्यांना केवळ पाच मिनिटांत १०० गणिते सोडविण्याचे आव्हान देण्यात आले होते. विद्यार्थ्यांनी वेग आणि अचूकतेचा सुरेख समन्वय साधत हे आव्हान यशस्वीपणे पूर्ण केले. 

या उल्लेखनीय कामगिरीची दखल घेत IPA फलटण सिद्धी अबॅकस सेंटरला ‘बेस्ट सेंटर’ म्हणून घोषित करण्यात आले. अकॅडमीच्या संचालिका सौ. कल्पना जाधव यांना ‘बेस्ट फ्रँचायजी’ पुरस्काराने सन्मानित करण्यात आले.

तसेच सिद्धी अबॅकस अकॅडमीमध्ये विद्यार्थ्यांना मार्गदर्शन करणाऱ्या सौ. रेखा खिलारे, सौ. सुनीता जाधव, सौ. पूजा गुळस्कर, सौ. सारंगा यादव आणि सौ. पद्मजा जंगम या पाचही शिक्षिकांना ‘बेस्ट टीचर’ म्हणून घोषित करून पुरस्कार व सन्मानचिन्ह देऊन गौरविण्यात आले.

विद्यार्थ्यांची मेहनत, शिक्षकांचे मार्गदर्शन आणि पालकांचे सहकार्य यांच्या जोरावर मिळालेले हे यश फलटणच्या शैक्षणिक क्षेत्रासाठी अभिमानाची बाब ठरली आहे. सिद्धी अबॅकस अकॅडमीच्या या उल्लेखनीय यशाबद्दल विद्यार्थी, शिक्षक, संचालिका आणि पालकांचे सर्व स्तरातून अभिनंदन होत आहे.