दुधेबावी फेस्टिव्हलचे सलग २६ व्या वर्षी आयोजन; ६ नोव्हेंबरपासून रंगणार संत गाडगेबाबा व्याख्यानमाला

फलटण प्रतिनिधी : 

फलटण तालुक्यातील दुधेबावी येथे दुधेबावी ग्रामविकास प्रतिष्ठानच्या वतीने सलग २६ व्या वर्षी दुधेबावी फेस्टिव्हलचे आयोजन करण्यात आले आहे. शुक्रवार, दिनांक ६ नोव्हेंबर ते मंगळवार, दिनांक १० नोव्हेंबर २०२६ या कालावधीत दररोज सायंकाळी ७ वाजता संत गाडगेबाबा व्याख्यानमालेचे आयोजन करण्यात आले असून, या फेस्टिव्हलचे उद्घाटन मुंबई उच्च न्यायालयाचे न्यायमूर्ती अनिल पानसरे यांच्या शुभहस्ते होणार आहे. अशी माहिती प्रतिष्ठानचे अध्यक्ष शशिकांत सोनवलकर यांनी दिली.

उद्घाटन समारंभाच्या अध्यक्षस्थानी सातारा जिल्ह्याचे जिल्हाधिकारी संतोष पाटील असणार आहेत. यावेळी विशेष अतिथी म्हणून प्रशासन व व्यवस्थापन वनविभाग, कुंडल (सांगली) येथील प्रशासकीय अधिकारी हरिश्चंद्र वाघमोडे तसेच चंदूकाका सराफ प्रायव्हेट लिमिटेड, बारामतीचे चेअरमन किशोर कुमार शहा उपस्थित राहणार आहेत.

उद्घाटन समारंभास प्रमुख पाहुणे म्हणून महाराष्ट्र राज्य शिक्षक संघाचे नेते संभाजीराव थोरात, महाराष्ट्र राज्य प्राथमिक शिक्षक समितीचे नेते उदयराव शिंदे, अखिल भारतीय शिक्षक महासंघाचे कोषाध्यक्ष सिद्धेश्वर पुस्तके, राष्ट्रीय शिक्षक संघाचे कार्यकारी अध्यक्ष बलवंत पाटील, महाराष्ट्र राज्य कृष्णा खोरे विकास महामंडळाचे संचालक माणिकराव सोनवलकर, प्राथमिक शिक्षक सहकारी बँकेचे चेअरमन विशाल कणसे, सातारा जिल्हा पत्रकार संघाचे माजी अध्यक्ष अरविंदभाई मेहता, महाराष्ट्र राज्य पत्रकार कल्याण निधीचे अध्यक्ष रवींद्र बेडकीहाळ, पश्चिम महाराष्ट्र पोलीस पाटील संघटनेचे उपाध्यक्ष हनुमंतराव सोनवलकर, जलसंपदा विभागाचे सेवानिवृत्त अधीक्षक अभियंता दिनकरराव सोनवलकर, पंचायत समिती सदस्या सौ. विजया सोनवलकर, ग्रामपंचायतीच्या सरपंच सौ. भावना सोनवलकर, पंचायत समितीचे माजी सदस्य सुभाषराव सोनवलकर, फलटण येथील नीरा उजवा कालवा विभागाचे कार्यकारी अभियंता रावसाहेब मोरे, एम.एस.ई.बी. बारामतीचे कार्यकारी अभियंता संजय सोनवलकर आणि जलविद्युत प्रकल्प सातारा येथील उपविभागीय अभियंता दिग्विजय सोनवलकर उपस्थित राहणार आहेत.

फेस्टिव्हलच्या उद्घाटन समारंभानिमित्त सुप्रसिद्ध निवेदक राजेंद्र खरात प्रस्तुत आणि वाघमोडे ज्वेलर्स अँड सन्स प्रायोजित 'खेळ रंगला पैठणीचा' हा विशेष कार्यक्रम आयोजित करण्यात आला आहे. याबाबत संत गाडगेबाबा व्याख्यानमाला कमिटीचे अध्यक्ष डॉ. सागर कराडे, सांस्कृतिक कमिटीचे अध्यक्ष सचिन सोनवलकर, क्रीडा समितीचे अध्यक्ष कांता सोनवलकर, दुधेबावी ग्रामविकास प्रतिष्ठानचे उपाध्यक्ष विजयकुमार नाळे, सचिव विठ्ठल सोनवलकर, खजिनदार डॉ. युवराज एकळ आणि कार्याध्यक्ष संतोष भांड यांनी माहिती दिली.

या कार्यक्रमाच्या अध्यक्षस्थानी सांगली जिल्हा परिषदेचे अतिरिक्त मुख्य कार्यकारी अधिकारी मनोज जाधव असणार आहेत. यावेळी चंदूकाका सराफ प्रायव्हेट लिमिटेड, बारामतीचे चेअरमन किशोर कुमार शहा यांना राज्यस्तरीय उद्योगरत्न पुरस्काराने, तर सातारा जिल्हा परिषदेचे अतिरिक्त मुख्य कार्यकारी अधिकारी राहुल गावडे यांना राज्यस्तरीय प्रशासनरत्न पुरस्काराने सन्मानित करण्यात येणार आहे.

या कार्यक्रमास प्रमुख पाहुणे म्हणून ज्येष्ठ पत्रकार प्रा. पोपटराव मिंट, चक्रधर ऍग्रो मशिनरी प्रायव्हेट लिमिटेड, दुधेबावीचे संस्थापक संपतराव नाळे आणि मुंबईचे पोलीस उपनिरीक्षक सागर नाळे उपस्थित राहणार आहेत.