युवा उद्योजक, यशस्वी बिल्डर आणि धाडसी राजकीय व्यक्तिमत्त्व सागर शहा

फलटण येथील युवा उद्योजक, सुप्रसिद्ध बांधकाम व्यावसायिक आणि धाडसी राजकीय व्यक्तिमत्त्व म्हणून ओळख असलेले सागर शहा यांचा आज वाढदिवस. या निमित्ताने त्यांच्या आजवरच्या व्यावसायिक आणि राजकीय वाटचालीचा घेतलेला हा विशेष आढावा...

माढा लोकसभा मतदारसंघाचे माजी खासदार रणजितसिंह नाईक निंबाळकर आणि फलटणचे लोकनियुक्त नगराध्यक्ष समशेरसिंह नाईक निंबाळकर यांचे निष्ठावंत सहकारी म्हणून सागर शहा यांची राजकीय वर्तुळात विशेष ओळख आहे. राजकारणात केवळ उपस्थिती नोंदविण्यापेक्षा आपल्या स्वतंत्र कार्यशैलीतून प्रभाव निर्माण करण्याची त्यांची हातोटी आहे.

अतिशय कमी वयात व्यवसाय क्षेत्रात स्वतःची वेगळी ओळख निर्माण करणाऱ्या सागर शहा यांनी बांधकाम व्यवसायात पदार्पण करून अल्पावधीतच आपले स्थान निर्माण केले. बांधकाम क्षेत्रातील अनुभव, व्यावसायिक दृष्टिकोन आणि कामातील चातुर्य यामुळे ते या क्षेत्रात एक हुशार व्यावसायिक म्हणून परिचित आहेत. विशेष म्हणजे, बिल्डर असोसिएशन ऑफ इंडिया, फलटण सेंटरचे उपाध्यक्ष म्हणूनही ते सध्या कार्यरत आहेत.

व्यवसायाबरोबरच राजकीय क्षेत्रातही त्यांनी आपली स्वतंत्र छाप पाडली आहे. भारतीय जनता पक्षाच्या ओबीसी सेलचे फलटण शहर अध्यक्ष म्हणून त्यांनी प्रभावीपणे काम केले आहे. मितभाषी स्वभाव, शांतपणे परिस्थितीचा अंदाज घेण्याची क्षमता आणि राजकीय घडामोडींचे अचूक आकलन ही त्यांच्या व्यक्तिमत्त्वाची वैशिष्ट्ये म्हणता येतील. बोलण्यापेक्षा योग्य वेळी योग्य भूमिका घेण्यावर त्यांचा अधिक भर असतो.

फलटणच्या राजकारणातील अलीकडील घडामोडींमध्येही सागर शहा यांची भूमिका महत्त्वपूर्ण राहिली आहे. लोकनियुक्त नगराध्यक्ष समशेरसिंह नाईक निंबाळकर यांच्या विजयामध्ये त्यांचा मोलाचा वाटा असल्याचे राजकीय वर्तुळात मानले जाते. संघटनात्मक काम, सहकाऱ्यांशी असलेला समन्वय आणि राजकीय परिस्थितीचा अभ्यास यामुळे त्यांचे योगदान विशेष ठरते.

युवकांमध्येही सागर शहा यांची विशेष क्रेझ आहे. त्यांच्या धाडसी स्वभावामुळे, व्यावसायिक यशामुळे आणि राजकीय क्षेत्रातील सक्रियतेमुळे तरुण वर्गात त्यांच्याविषयी आकर्षण आणि आपुलकी पाहायला मिळते.

समाजकारणाचीही त्यांना विशेष आवड असून, अनेक गरजू व्यक्तींना ते वेळोवेळी मदतीचा हात देत असतात. समाजातील विविध घटकांच्या अडचणी समजून घेत त्यांना शक्य ती मदत करण्याचा त्यांचा प्रयत्न असतो. केवळ व्यवसाय आणि राजकारण एवढ्यापुरते स्वतःला मर्यादित न ठेवता समाजसेवेला प्राधान्य देण्याची त्यांची भूमिका त्यांच्या व्यक्तिमत्त्वातील संवेदनशील आणि सामाजिक भान जपणारा पैलू अधोरेखित करते. त्यामुळेच व्यावसायिक आणि राजकीय ओळखीबरोबरच मदतीसाठी तत्पर असणारे व्यक्तिमत्त्व म्हणूनही सागर शहा यांच्याकडे पाहिले जाते.

एकीकडे बांधकाम व्यवसायात यशस्वी वाटचाल, दुसरीकडे राजकीय क्षेत्रात प्रभावी संपर्क आणि त्याचबरोबर युवकांमध्ये असलेली लोकप्रियता, अशा विविध पैलूंनी सागर शहा यांचे व्यक्तिमत्त्व घडले आहे.

व्यवसायात प्रगतीची नवी शिखरे गाठताना सामाजिक आणि राजकीय क्षेत्रातही आपला प्रभाव अधिक व्यापक करण्याची क्षमता असलेल्या या युवा व्यक्तिमत्त्वाची वाटचाल निश्चितच लक्षवेधी आहे.

वाढदिवस हा केवळ आनंदाचा दिवस नसून नव्या संकल्पांचा आणि नव्या यशाचा प्रारंभ असतो. सागर शहा यांना उत्तम आरोग्य, उदंड आयुष्य, व्यवसायात भरभराट आणि राजकीय व सामाजिक क्षेत्रात उत्तरोत्तर यश लाभो, हीच मनःपूर्वक सदिच्छा!वाढदिवसाच्या हार्दिक शुभेच्छा! 

सचिन मोरे, वरिष्ठ पत्रकार, लेखक, मोटिवेशनल स्पिकर,