प्रल्हादराव साळुंखे-पाटील यांच्या अमृत महोत्सवी अभिष्टचिंतन सोहळ्याचे मंगळवार ६ ऑक्टोबरला भव्य आयोजन

फलटण प्रतिनिधी - 

फलटण तालुक्याच्या सामाजिक, सार्वजनिक आणि सहकार क्षेत्रात प्रदीर्घकाळ उल्लेखनीय योगदान देणारे ज्येष्ठ नेते प्रल्हादराव साळुंखे-पाटील यांच्या ७५व्या अमृत महोत्सवी वर्षानिमित्त अभिष्टचिंतन सोहळ्याचे आयोजन मंगळवार, दि. ६ ऑक्टोबर २०२६ रोजी सायंकाळी ५ वाजता सुरवडी येथील रॉयल पॅलेस मंगल कार्यालयात करण्यात आले आहे. अमृत महोत्सवी अभिष्टचिंतन सोहळ्यास सातारा लोकसभा मतदारसंघाचे खासदार श्रीमंत छत्रपती उदयनराजे भोसले यांची प्रमुख उपस्थिती राहणार आहे. तसेच महाराष्ट्र राज्याचे ग्रामविकास व पंचायत राज मंत्री जयकुमार गोरे, सार्वजनिक बांधकाम मंत्री छत्रपती शिवेंद्रसिंहराजे भोसले, माजी खासदार रणजितसिंह नाईक-निंबाळकर तसेच फलटण विधानसभा मतदारसंघाचे आमदार सचिन पाटील यांच्यासह राजकीय, सामाजिक, सहकार, शैक्षणिक तसेच विविध क्षेत्रांतील मान्यवरांची उपस्थिती राहणार आहे.

प्रल्हादराव साळुंखे-पाटील यांच्या प्रदीर्घ सार्वजनिक जीवनातील योगदानाचा गौरव आणि त्यांच्या कार्याप्रती कृतज्ञता व्यक्त करण्याच्या उद्देशाने हा सोहळा आयोजित करण्यात आला आहे. संघर्षातून उभे राहिलेले नेतृत्व, माणुसकीच्या नात्यांना दिलेले महत्त्व आणि जनसेवेतून विश्वास निर्माण केला असून सामाजिक, सार्वजनिक, सहकार, शैक्षणिक आणि लोकहिताच्या विविध उपक्रमांशी प्रल्हादराव साळुंखे-पाटील यांचा प्रदीर्घकाळ संबंध राहिला आहे. कार्याच्या या प्रवासात त्यांनी शेतकरी, कामगार, युवक, कार्यकर्ते तसेच सर्वसामान्य नागरिकांशी जपलेली आत्मीयता आणि निर्माण केलेली माणुसकीची नाती ही त्यांच्या सार्वजनिक जीवनाची विशेष ओळख ठरली आहे.

प्रल्हादराव साळुंखे-पाटील यांच्या अमृत महोत्सवी वर्षानिमित्त आयोजित करण्यात आलेला हा कार्यक्रम केवळ वाढदिवसाचा सोहळा नसून, त्यांच्या दीर्घ सामाजिक आणि सार्वजनिक प्रवासाबद्दल व्यक्त होणारी कृतज्ञता, स्नेह आणि आदराची भावना आहे. या निमित्ताने त्यांच्या सार्वजनिक जीवनातील विविध आठवणींना उजाळा मिळणार आहे. कार्यक्रमास मान्यवर, हितचिंतक, कार्यकर्ते, मित्रपरिवार आणि नागरिकांनी सहकुटुंब उपस्थित राहून स्नेहभोजनाचा आस्वाद घ्यावा, असे आवाहन नगराध्यक्ष समशेरसिंह नाईक निंबाळकर पंचायत समिती च्या सभापती शिवांजली भोसले आणि पंचायत समितीचे सदस्य धनंजय साळुंखे पाटील यांनी केले आहे.