सातारा जिल्हा मध्यवर्ती सहकारी बँक निवडणुकीसाठी फलटणमध्ये कलम १६३ लागू; मतदान केंद्र परिसरात कडक निर्बंध - कार्यकारी दंडाधिकारी तथा तहसीलदार डॉ. अभिजित जाधव

फलटण : सातारा जिल्हा मध्यवर्ती सहकारी बँकेच्या संचालक मंडळाच्या सन २०२६ मधील निवडणुकीच्या पार्श्वभूमीवर फलटण तालुक्यात कायदा व सुव्यवस्था राखण्यासाठी भारतीय नागरिक सुरक्षा संहिता २०२३ च्या कलम १६३ अन्वये प्रतिबंधात्मक आदेश लागू करण्यात आले आहेत. कार्यकारी दंडाधिकारी तथा तहसीलदार डॉ. अभिजित जाधव यांनी ३० ऑक्टोबर २०२६ रोजी याबाबत आदेश जारी केला आहे.

फलटण तालुक्यात रविवार, दि. १ नोव्हेंबर २०२६ रोजी सकाळी ८ ते सायंकाळी ५ या वेळेत श्रीमंत राणीसाहेब सौ. लक्ष्मीदवी मालोजीराजे नाईक निंबाळकर नगरपरिषद शाळा क्रमांक ८, फलटण येथे मतदान प्रक्रिया पार पडणार आहे.

या निवडणुकीदरम्यान मतदान प्रक्रिया शांततेत, निर्भय व सुरळीत वातावरणात पार पडावी, यासाठी मतदान केंद्राच्या आवारात ३१ ऑक्टोबर रोजी रात्री १२ वाजल्यापासून मतदान प्रक्रिया संपेपर्यंत विविध निर्बंध लागू करण्यात आले आहेत.

आदेशानुसार लागू करण्यात आलेले निर्बंध पुढीलप्रमाणे :

1. पाच किंवा पाचपेक्षा अधिक लोकांनी एकत्र येण्यास मनाई राहील. पूर्वनियोजित सामाजिक व धार्मिक कार्यक्रम तसेच अधिकृत निवडणूक अधिकारी व कर्मचारी यांना यातून वगळण्यात आले आहे.

2. मतदान केंद्राच्या २०० मीटर परिसरात उमेदवारांचे बूथ उभारणे तसेच बॅनर, पोस्टर, चिन्हे आदी प्रचार साहित्य बाळगणे किंवा वापरण्यास मनाई असेल.

3. मतदान केंद्राच्या १०० मीटर परिसरात मोबाईल फोन, कॉर्डलेस फोन, लाऊडस्पीकर, मेगाफोन, वायरलेस सेट बाळगणे किंवा वापरण्यास मनाई असेल. अधिकृत निवडणूक अधिकारी व कर्मचारी यांना यातून वगळण्यात आले आहे.

4. मतदान केंद्राच्या १०० मीटर परिसरातील सर्व प्रकारच्या आस्थापना व दुकाने सुरू ठेवण्यास मनाई असेल.

5. मतदान केंद्रातील मतदान प्रतिनिधी व इतर प्रतिनिधींना मोबाईल वापरणे, फोटो काढणे, चित्रिकरण करणे तसेच मतदानाच्या गोपनीयतेचा भंग करणाऱ्या कृती करण्यास मनाई असेल.

6. मतदान केंद्राच्या १०० मीटर परिसरात शस्त्र अधिनियम १९५९ मध्ये नमूद केल्याप्रमाणे कोणत्याही प्रकारची शस्त्रे बाळगण्यास मनाई असेल. नेमणुकीवरील पोलीस अधिकारी व कर्मचाऱ्यांना यातून वगळण्यात आले आहे.

7. मतदान केंद्राच्या १०० मीटर परिसरात निवडणूकविषयक प्रचार करणे, मतदारांना धमकावणे, विशिष्ट उमेदवाराला मतदान करण्यासाठी दबाव टाकणे किंवा मतदानाचा हक्क बजावण्यापासून रोखण्यासाठी कोणत्याही प्रकारचा दबाव आणण्यास मनाई असेल.

आदेशाचे उल्लंघन केल्यास कारवाई

सदर आदेशाचे कोणत्याही प्रकारे उल्लंघन करणारी व्यक्ती भारतीय नागरिक सुरक्षा संहिता २०२३ च्या कलम २२३ नुसार शिक्षेस पात्र राहील, असा स्पष्ट इशारा आदेशात देण्यात आला आहे.

या आदेशाची अंमलबजावणी करण्यासाठी संबंधित पोलीस व प्रशासकीय यंत्रणांना प्रत पाठविण्यात आली आहे.