विद्यार्थ्यांच्या सर्वांगीण विकासासाठी रोटरी क्लबचा पुढाकार; श्री जितोबा विद्यालयास संगणक संच भेट

फलटण  - धैर्य टाईम्स मीडिया 

रोटरी क्लब ऑफ फलटण तालुका यांच्या वतीने रयत शिक्षण संस्थेच्या श्री जितोबा विद्यालय, जिंती, ता. फलटण, जि. सातारा येथे विद्यार्थ्यांच्या शैक्षणिक, आरोग्यविषयक व सामाजिक जाणीवा वृद्धिंगत करण्याच्या उद्देशाने विविध उपक्रमांचे आयोजन करण्यात आले. यावेळी विद्यालयास संगणक संच भेट देण्यात आला.

बदलत्या तंत्रज्ञानाच्या युगात विद्यार्थ्यांना संगणक व एआय शिक्षणाची आवश्यकता लक्षात घेऊन रोटरी क्लबच्या वतीने हा संगणक संच देण्यात आला. तसेच विद्यालय परिसरात वृक्षारोपण, आरोग्य तपासणी शिबिर, प्लास्टिक निर्मूलन जनजागृती आणि वैज्ञानिक जाणीव जागृती कार्यक्रम घेण्यात आले.

रोटरी क्लब ऑफ फलटणचे संस्थापक संजीवराजे नाईक निंबाळकर यांच्या मार्गदर्शनाखाली आयोजित या उपक्रमावेळी रोटरी क्लबचे अध्यक्ष डॉ. रो. महेश बर्वे, राजेंद्र रणवरे, प्रकाश रणवरे, महादेव रणवरे, नवनाथ रणवरे, चंद्रकांत रणवरे, शरदराव रणवरे, विनायकराव रणवरे, शरदसर रणवरे, जगदेवराव रणवरे, माधुरी जाधव, ताराचंद्र आवळे आदी मान्यवर उपस्थित होते.

आरोग्य तपासणी शिबिरात विद्यालयातील दोनशेहून अधिक विद्यार्थ्यांची आरोग्य तपासणी करण्यात आली. विद्यार्थ्यांना आवश्यक आरोग्यविषयक मार्गदर्शनही करण्यात आले. या शिबिरासाठी बालरोगतज्ज्ञ डॉ. अंकिता गांधी व डॉ. सई खराडे यांचे मोलाचे सहकार्य लाभले.

पर्यावरण संवर्धनाचा संदेश देत विद्यालय परिसरात वृक्षारोपण करण्यात आले. प्लास्टिक निर्मूलन जनजागृती कार्यक्रमात रोटरी क्लबचे अध्यक्ष डॉ. रो. महेश बर्वे यांनी विद्यार्थ्यांना प्लास्टिकचा वापर टाळणे, पर्यावरणाचे संवर्धन करणे याबाबत मार्गदर्शन केले. यावेळी उपस्थित विद्यार्थी व नागरिकांना प्लास्टिक निर्मूलनाची शपथ देण्यात आली.

रोटरी क्लबचे सचिव सुधीर इंगळे यांनी विविध वैज्ञानिक प्रयोग प्रत्यक्ष करून दाखवत विद्यार्थ्यांमध्ये वैज्ञानिक दृष्टिकोन विकसित करण्याचे महत्त्व स्पष्ट केले. तसेच अंधश्रद्धा निर्मूलन आणि विवेकपूर्ण वैज्ञानिक विचारसरणीबाबत मार्गदर्शन केले.

या उपक्रमातून विद्यार्थ्यांमध्ये आरोग्याविषयी जागरूकता, पर्यावरण संवर्धनाची भावना, वैज्ञानिक दृष्टिकोन तसेच अंधश्रद्धेविरोधात विवेकपूर्ण विचारसरणी निर्माण करण्याचा महत्त्वपूर्ण संदेश देण्यात आला.

कार्यक्रमाचे प्रास्ताविक समुपदेशक ताराचंद्र आवळे यांनी केले. सूत्रसंचालन अंकुश सोळंकी यांनी केले, तर आभार अमोल जाधव यांनी मानले. कार्यक्रम यशस्वी करण्यासाठी नवनाथ रणवरे, प्रणव रणवरे, रणजित रणवरे तसेच विद्यालयातील शिक्षकांनी सहकार्य केले. यावेळी विद्यालयाचे शिक्षक, विद्यार्थी, जिंती गावातील ग्रामस्थ, रोटरी क्लबचे पदाधिकारी व सदस्य तसेच माजी विद्यार्थी मोठ्या संख्येने उपस्थित होते.