फलटण - कोरेगाव विधानसभा मतदार संघात ३९ नामनिर्देशन पत्र दाखल - उपविभागीय अधिकारी तथा निवडणुक निर्णय अधिकारी सचिन ढोले : संविधान समर्थन समितीच्या वतीने बौद्ध समाजातून उमेदवारी अर्ज दाखल

फलटण प्रतिनिधी -

२५५ फलटण - कोरेगाव (अ.जा.) विधानसभा मतदार संघासाठी एकूण ५९ जणांनी ९० नामनिर्देशन अर्ज खरेदी केले असून ३९ जणांनी उमेदवारी अर्ज दाखल केले असल्याची माहिती निवडणुक निर्णय अधिकारी तथा उपविभागीय अधिकारी सचिन सचिन ढोले यांनी दिली. 

आज नामनिर्देशन पत्र दाखल करण्याच्या शेवटच्या दिवशी २६ अर्ज दाखल झाले तर एकूण ३९ नामनिर्देशन दाखल झाले आहेत. आज दिगंबर आगवणे व त्यांची पत्नी सौ. जयश्री आगवणे यांनी राष्ट्रीय समाज पक्षाच्या वतीने नामनिर्देशन पत्र दाखल केले. यावेळी तहसील परिसरात चोक पोलीस बंदोबस्त ठेवण्यात आला होता. 

वंचित बहुजन आघाडीच्या वतीने सचिन भिसे यांनी नामनिर्देशन पत्र दाखल केले आहे. तर प्रशांत कोरेगावकर यांनीही भाजप, राष्ट्रवादी काँग्रेस व अपक्ष असे नामनिर्देशन दाखल केले आहे. 

यापूर्वीच विद्यमान आमदार दिपक चव्हाण यांनी राष्ट्रवादी काँग्रेस शरदचंद्र पवार पक्षाच्या वतीने नामनिर्देशन पत्र दाखल केले आहेत. तर राष्ट्रवादी काँग्रेस अजित पवार गटाला महायुतीतून मतदारसंघ सुटल्याने मा. खा. रणजितसिंह नाईक निंबाळकर यांचे सहकारी सचिन कांबळे पाटील यांनी राष्ट्रवादी काँग्रेस पक्षात प्रवेश करत महायूतीतून नामनिर्देशन पत्र दाखल केले आहे. 

२००९ मध्ये नव्याने निर्माण झालेल्या राखीव विधानसभा मतदारसंघात अनुसूचित जाती प्रवर्गातील सर्वाधिक लोकसंख्या असणाऱ्या बौध्द समाजातील घटकाला गेल्या तीन विधानसभा निवडणुकीत उमेदवारी मिळाली पार्श्वभूमीवर २०२४ च्या होणाऱ्या विधानसभा निवडणूकीत बौध्द समाजाला उमेदवारी मिळावी यासाठी अवघ्या फलटण - कोरेगांव विधानसभा मतदारसंघातील बौध्दांनी " एकच निर्धार ...बौद्ध आमदार ' अशी प्रतिज्ञा घेत तालुक्यात संवाद अभियान सुरू केले होते. 

खा. शरद पवार, उपमुख्यमंत्री अजित पवार, मा. खा. रणजितसिंह नाईक निंबाळकर, आ. रामराजे नाईक निंबाळकर यांना भेटून बौद्ध समाजाला येणाऱ्या विधानसभा निवडणुकीत प्रतिनिधित्व मिळावे याकरिता निवेदन देत मागणी केली होती. मात्र वरील पैकी कोणत्याही पक्षाने बौद्ध समाजाला उमेदवारी दिली नाही. त्यामुळे अखेर संविधान समर्धन समितीच्या वतीने नंदु मोरे, बुवासाहेब हुंबरे, गंगाराम रणदिवे व प्रा. रमेश आढाव यांनी (अपक्ष व स्वाभिमानी शेतकरी संघटना) अशी नामनिर्देशन पत्र दाखल केले आहेत.

उद्या दिनांक ३० ऑक्टोबर रोजी नामनिर्देशन पत्रांची छाननी केली जाईल तर दि ४ नोव्हेंबर पर्यंत नामनिर्देशन अर्ज मागे घेता येतील आणि दिनांक २० नोव्हेंबर रोजी मतदान प्रक्रिया पार पडेल दिनांक २३ नोव्हेंबर ला मतमोजणी करण्यात येईल अशी माहिती यावेळी ढोले यांनी दिली. 

फलटण - कोरेगाव विधानसभा मतदार संघात एकूण मतदार ३३८४६४ इतके मतदार असून पुरुष मतदार १७२४५९ तर स्त्री मतदार  १६५९९१ आहेत व इतर मतदार संख्या १४ इतकी आहे. यामध्ये सैनिक मतदार         ९५६ दिव्यांग मतदार २१६० असल्याची माहिती सचिन ढोले यांनी दिली. मतदार संघातील एकूण मतदान केंद्र ३५५ आहेत.शहरी मतदान केंद्र ४७,ग्रामिण मतदान केंद्र ३०८ आहेत. 

राष्ट्रीय समाज पक्षाचे उमेदवार दिगंबर आगवणे हे सध्या काही गुन्हामध्ये अटक आहेत. ते आज नामनिर्देशात पत्र दाखल करण्यासाठी आले होते. त्यावेळी आगवणे समर्थकांची मोठी गर्दी तहसील परिसरात झाली होती. 

संविधान समर्थन समितीच्या वतीने भारतरत्न डॉ. बाबासाहेब आंबेडकर स्मृती भवन येथून तहसील कार्यालयापर्यंत रॅली काढण्यात आली होती. एकच निर्धार बौद्ध आमदार च्या घोषणा देत बौद्ध समाजातील उमेदवारांचे नामनिर्देशन पत्र दाखल केले.