फलटण नगर परिषदचे 140 कर्मचारी संपावर : पाणी पुरवठा विभाग मात्र सुरु

जुनी पेन्शन योजना व सरकारी कर्मचाऱ्यांच्या प्रलंबित मागण्यांसाठी सरकारी-निमसरकारी शिक्षक, शिक्षकेतर महापालिका, नगरपालिका, नगर परिषदा, नगर पंचायती कर्मचारी समन्वय समितीमार्फत मंगळवार, दि.14 मार्चपासून राज्यव्यापी बेमुदत संपावर गेले अहाेत. याच पार्श्वभूमीवर  फलटण नगर परिषदेतील  140 कर्मचारी संपावर गेल्याने  फलटण नगरपालिकेतील  पाणीपुरवठा वगळता सर्व कामकाज पूर्णपणे ठप्प झाले आहे.

फलटण तालुक्यातील सर्वच सरकारी कर्मचारी संघटनांनी मंगळवारी प्रांत कार्यालय परिसरात जमा झाले. त्यामध्ये फलटण नगर परिषदेतील कर्मचाऱ्यांचा सहभाग होता. यावेळी 'एकच मिशन, जुनी पेन्शन' या घोषणांनी हा परिसर दुमदुमून गेला. वर्ग ३ पासून सर्व कर्मचारी संपात सहभागी झाले आहेत त्यामुळे फलटण नगर परिषदेतील सर्व विभाग ओस पडले होते.

फलटण नगरपरिषदेमधील  आरोग्य विभाग, स्वच्छता विभाग , भांडार विभाग  बांधकाम विभाग , आस्थापना, जन्म - मृत्यू या विभागातील कर्मचारी संपात सहभागी असल्याने फलटणकर नागरिकांचे मोठे हाल होताना दिसून आले. अनेक नागरिक हताश होऊन नगरपालिकेतून  परत जाताना दिसले.  मात्र पाणी पुरवठा विभाग सुरु असल्याने फलटणकरांनी समाधान व्यक्त केले आहे.

गेल्या अनेक दिवसांपासून सरकारी कर्मचाऱ्यांच्या मागण्या प्रलंबित आहेत. यासंदर्भात विविध संघटनांनी चर्चा, निवेदने दिले. मात्र, त्यावर कार्यवाही झाली नाही. सर्वांना जुनी पेन्शन योजना लागू करा, सर्व कंत्राटी कर्मचाऱ्यांच्या सेवा नियमित करा, सर्व रिक्त पदे अग्रक्रमाने भरा, चतुर्थ श्रेणी कर्मचाऱ्यांची पदे निरसित करू नका, शिक्षक-शिक्षकेतर कर्मचाऱ्यांना सेवांतर्गत अन्यासित प्रगती योजनेचा लाभ द्या वगैरे मागण्या दीर्घकाळ प्रलंबित राहिल्यामुळे कर्मचारी- शिक्षकांमध्ये रोष व्यक्त होत आहे. त्यामुळे सरकारी कर्मचारी १४ मार्चपासून बेमुदत संपावर ठाम आहेत.