18 जागांसाठी 121 उमेदवारी अर्ज : फलटण कृषी उत्पन्न बाजार समिती निवडणूक

कृषी उत्पन्न बाजार समिती फलटण च्या १८ जागासाठी फॉर्म भरण्याच्या शेवटच्या दिवशी आज दिनांक ३ रोजी १२१ एवढ्या एकूण उमेदवारांनी फॉर्म भरला असून सर्वांचे लक्ष आता उमेदवारी अर्जांची छाननी प्रक्रियेकडे लागली आहे.

 कृषी उत्पन्न बाजार समिती फलटण च्या १८ जागासाठी सोमवार, दिनांक. २७ मार्च ते दिनांक. ३ एप्रिल दरम्यान अर्ज दाखल करण्याची मुदत होती. बाजार समितीच्या सध्याच्या निवडणूक पद्धतीत कार्यक्षेत्रातील सेवा संस्था व बहुउद्देशीय सहकारी संस्था सदस्यांकडून ११ व ग्रामपंचायत सदस्यांकडून ४ असे १५ शेतकरी प्रतिनिधी निवडले जाणार असून. व्यापारी २ व हमाल, मापाडी १ असे एकूण १८ प्रतिनिधी निवडून दिले जाणार आहेत. ११ जागासाठी विविध कार्यकारी सोसायटी गट १ हजार ६३४ मतदान असून ४ जगासाठी ग्रामपंचायत गट १ हजार १८७ मतदान आहे तर २ जगासाठी व्यापारी व आडते गट ८२ मतदान आहे. १ हमाल मापाडी गट जागेसाठी ३९ मतदान असे १८ जगासाठी एकूण २ हजार ९४२ मतदार या निवडणुकीत मतदान करणार आहेत.

दिनांक ३ रोजी १२१ एवढ्या एकूण उमेदवारांनी फॉर्म भरला असून दिनांक ५ एप्रिल रोजी दुपारी १२ वाजल्यापासून छाननी संपेपर्यंत सर्व दाखल उमेदवारी अर्जांची छाननी निवडणूक निर्णय अधिकारी यांच्या कार्यालयात होणार आहे. दिनांक. ६ एप्रिल रोजी सकाळी ११ वाजता निवडणूक निर्णय अधिकारी यांच्या कार्यालयात छाननी नंतर वैध अर्जांची यादी प्रसिद्ध केली जाईल, दिनांक. ६ ते २० एप्रिल रोजी दरम्यान सकाळी ११ ते दुपारी ३ वाजेपर्यंत निवडणूक निर्णय अधिकाऱ्यांच्या कार्यालयात उमेदवारी अर्ज मागे घेता येतील. दिनांक २१ एप्रिल रोजी दुपारी १२ वाजता निवडणूक निर्णय अधिकाऱ्यांच्या कार्यालयात निवडणूक लढविणाऱ्या उमेदवारांची अंतिम यादी प्रसिद्ध करणे आणि उमेदवारांना निवडणूक चिन्हांचे वाटप करण्यात येईल.मतदान व मतमोजणी ठिकाण नंतर जाहीर करण्यात येणार आहे. दिनांक. ३० एप्रिल रोजी सकाळी ७ ते दुपारी ४ या वेळेत मतदान आणि त्यानंतर मतदान संपल्यानंतर अर्ध्या तासाने मतमोजणी होऊन मतमोजणी निकाल जाहीर करण्यात येईल.

सोसायटी मतदार संघ यामध्ये ११ संचालक निवडून द्यावयाचे त्यापैकी सर्वसाधारण ७ जागांसाठी ५२ अर्ज, महिला २ जागांसाठी ९ अर्ज, इतर मागास प्रवर्ग १ जागेसाठी ६, अर्ज भटक्या विमुक्त जाती जमाती १ जागेसाठी १४ अर्ज दाखल झाले आहेत. ग्रामपंचायत मतदार संघामध्ये ४ संचालक निवडून द्यावयाचे त्यापैकी सर्वसाधारण २ जागेसाठी २६ अर्ज, अनुसूचित जाती जमाती १ जागेसाठी २ अर्ज, आर्थिक दुर्बल १ जागेसाठी ७ अर्ज दाखल करण्यात आले आहेत. व्यापारी व आडते मतदार संघ २ जागेसाठी ४ अर्ज दाखल करण्यात आले आहेत. हमाल मापाडी मतदार संघ १ जागेसाठी १ अर्ज दाखल करण्यात आला आहे असे एकूण १८ जागासाठी १२१ फॉर्म भरण्यात आले आहेत अशी माहिती निवडणुक निर्णय अधिकारी तथा सहाय्यक निबंधक सहकारी संस्था फलटण सुनील धायगुडे यांनी दिली आहे.