हा तर फलटणच्या विकासाचा ट्रेलर... पिक्चर अभी बाकी हैं - खा. रणजितसिंह

भारतरत्न डॉ. बाबासाहेब आंबेडकर यांनी संविधानाने लोकशाही दिली मात्र फलटण मध्ये लोकशाही गाढण्याचे काम रामराजे यांनी केले. तुम्ही माझ्यामागे सामर्थ्य उभे करा आपण पुन्हा एकदा फलटणमध्ये लोकशाही नांदवू : खा.रणजितसिंह 

फलटण मध्ये येऊ घातलेले निरा - देवघर चे पाणी, पंढरपूर रेल्वेचा निधी, महावितरणची कामे, वारकरी भवन, फलटण - दहिवडी- सांगली महामार्ग,फलटणसाठी मंत्री नितीन गडकरी यांनी दिलेला 100 कोटींचा निधी, या सह आजपर्यंत या मतदारसंघात आलेले विविध कामे हा केवळ फलटणच्या विकासाचा ट्रेलर असून पिक्चर अभी बाकी है असे सांगत फलटणला विकासाच्या सर्वोच्च शिखरावर नेहणार असल्याचे खासदार रणजितसिंह नाईक निंबाळकर यांनी आपल्या भाषणातून स्पष्ट केले, ते तीन दिवसीय फलटण तालुका संपर्क दौऱ्यानंतर विडणी येथील आभार सभेत बोलत होते.

यावेळी माजी सनदी अधिकारी विश्वासराव भोसले, फलटण तालुका संघर्ष समितीचे अध्यक्ष व जेष्ठ विधीज्ञ ॲड.नरसिंह निकम , माजी पंचायत समिती सदस्य धनंजय साळुंखे पाटील, विठ्ठल नाळे, सातारा जिल्हा भाजपा सरचिटणीस जयकुमार शिंदे, फलटण तालुका अध्यक्ष बजरंग गावडे, उपाध्यक्ष तुकाराम ढमाळ, स्वराज पतसंस्थेचे चेअरमन अभिजित नाईक निंबाळकर, माजी नगरसेवक अशोकराव जाधव, अनुप शहा, सचिन अहिवळे,जाकीर मणेर, शहराध्यक्ष अमोल सस्ते, विडणीचे लोकनियुक्त सरपंच सागर अभंग, निंभोरेच्या सरपंच कांचन रणवरे,बाळासाहेब ननावरे, तुकाराम शिंदे,अमित रणवरे,सचिन ननावरे,भाजपा महिला आघाडीच्या सौ. उषा राऊत,विडणी ग्रामपंचायत सदस्य यांच्या सह विविध मान्यवर उपस्थित होते.

यावेळी बोलताना पुढे खासदार रणजितसिंह म्हणाले की, निरा - देवघर चे बारामती ला जाणारे पाणी आपण पुन्हा फलटणला वळवल्याने खासदार शरद पवार यांच्याशी राजकीय वैर पत्करले आहे. निरा -देवघर करीता अनेकांचे योगदान असून त्यापैकीच एक फलटण तालुक्याचे ज्येष्ठ नेते सुभाषराव शिंदे यांचा आपण नुकताच सत्कार केल्याचे खासदार रणजितसिंह यांनी सांगितले. निरा -देवघर, फलटण- पंढरपूर रेल्वे, फलटण -दहिवडी -सांगली महामार्ग, पुणे- बेंगलोर मार्ग जो फलटण वरून जाणार आहे, फलटण शहरासाठी 100 कोटींची रस्त्यांची कामे नामदान नितीन गडकरी यांनी दिली असून हा फलटणच्या विकासाचा केवळ ट्रेलर असून फलटण येथे सेशन कोर्टाची मंजूर झाल्याने लवकर तेही सुरू होणार असल्याचे सांगत उपजिल्हा रुग्णालयाचे काम तातडीने सुरू होणार आहे. ज्यामध्ये संपूर्ण आरोग्य सुविधा मोफत उपलब्ध होणार असून तालुक्यासाठी आरोग्याच्या दृष्टीनेमोठे योगदान राहणार आहे. लवकरच आपण फलटणसाठी आरटीओ कार्यालय व प्रशासकीय भवनसाठी विशेष प्रयत्न करणार असल्याचे खासदार रणजितसिंह नाईक निंबाळकर यांनी निदर्शनात आणून दिले. केवळ लाल दिव्यासाठी 14 टी. एम. सी.पाणी बारामतीला वळवण्याचे महापाप रामराजे यांनी केले असून फलटणच्या जनतेचे गद्दार म्हणून त्यांचं नाव इतिहासात लिहिले जाणार असल्याचे खा. निंबाळकर यांनी सांगितले.

रामराजे यांनी जनतेचा विकासाच्या नावाखाली विश्वासघात केला आहे. त्यांनी केलेले पाप आता आपण जनतेच्या आशिर्वादाने धुऊन काढणार असून फलटणचा विकासाचा अनुशेष भरून काढणार असल्याचे अभिवचन खासदार रणजितसिंह यांनी दिले.

फलटणचा श्रीराम साखर कारखाना जवाहरला चालवायला दिला, सहकारी दूध संघ केवळ कागदोपत्री चालू ठेवला, श्रीमंत मालोजीराजे सहकारी बँक बुलढाणा अर्बन ला चालवायला दिली, खरेदी विक्री संघही गायब केला असून गेल्या 30 वर्षात फलटण शहरही अधोगतीला नेहले असल्याचा आरोप यावेळी खासदार रणजितसिंह यांनी केला.

भारतरत्न डॉ. बाबासाहेब आंबेडकर यांनी संविधानाने लोकशाही दिली मात्र फलटण मध्ये लोकशाही गाढण्याचे काम रामराजे यांनी केले. तुम्ही माझ्यामागे सामर्थ्य उभे करा आपण पुन्हा एकदा फलटणमध्ये लोकशाही नांदवू असा विश्वास यावेळी खासदार रणजितसिंह यांनी व्यक्त केला.

फलटण तालुक्यातील साखरवाडी व विडणी या दोन्ही गावांना नगरपंचायतचा दर्जा मिळावा यासाठी प्रयत्न करणार असल्याचे खासदार रणजितसिंह यांनी निदर्शनास आणून दिले.

 फलटण - पंढरपूर रेल्वे मार्गावरील विडणीच्या जवळपास रेल्वे स्थानक करण्याचा आपला मानस असल्याचे सांगत याचा फायदा परिसरातील शेतकरी, विद्यार्थी, उद्योजकांना होणार असल्याचे खासदार निंबाळकर यांनी लक्षात आणून दिले. येणाऱ्या निवडणुकांमध्ये भारतीय जनता पक्षाच्या पाठीमागे ताकद उभी करा असे आवाहन यावेळी खासदार रणजितसिंह नाईक निंबाळकर यांनी केले.