फलटण येथे इंडियन स्वच्छता लोग २.० अभियान यशस्वी

फलटण प्रतिनीधी:- स्वच्छ भारत अभियान २.० (ना.) अंतर्गत केंद्रीय गृहनिर्माण तथा शहरी कार्य मंत्रालय, भारत सरकार यांनी दि. १५ सप्टेंबर २०२३ ते दि. २ ऑक्टोबर २०२३ या कालावधीत स्वच्छता पंधरवडा आयोजित करण्याचे निर्देश दिले होते. या पार्श्वभूमीवर अभियानाचा भाग म्हणून फलटण नगर परिषदेने इंडियन स्वच्छता लोग २.०, सफाईमित्र यांच्याकरिता सेवा व सुरक्षा शिबीर, श्रमदान अशा विविध कार्यक्रमांचे आयोजन केले होते.

सदर अभियानाची नोंदणी पोर्टलवर करून एकूण १२ प्रभागामध्ये एकूण २४ स्वच्छता विषयक श्रमदान कार्यक्रमांचे आयोजन स्थानिक जनसहभाग, प्रतिष्टीत व्यक्तींच्या उपस्थीतीत करण्यात आले. दि.१ रोजीच्या श्रमदान कार्यक्रमामध्ये ६५० व्यक्तींच्या सहभागाने अंदाजित २२, २५० चौरस मीटर एवढे क्षेत्र स्वच्छ करण्यात येऊन २.९ टन कचऱ्याचे संकलन करण्यात आले. या वेळी नगरपरिषदेच्या १६ घंटागाडी, २ ट्रकटर चा उपयोग करण्यात आला.

श्रमदानामध्ये क्रेडाई फलटण यांनी मालोजी राजे पुतळा व माळजाई परिसर येथे, बिल्डर्स असोसिएशन फलटण यांनी विमानतळ परिसर, मुधोजी महाविद्यालय विद्यार्थी व शिक्षक यांनी महाविद्यालय परिसर, अप्पासाहेब धर्माधिकारी प्रतिष्ठान यांनी प्रांत कार्यालय व तहसील कार्यालय परिसर येथे पोलीस विभागातील कर्मचारी यांनी उपविभागीय पोलीस अधिकारी कार्यालय व फलटण शहर पोलीस स्टेशन परिसर येथे न्यायालय कर्मचारी यांनी फलटण न्यायालय येथे, प्राथमिक आरोग्य केंद्र फलटण शहर येथे संबंधित कर्मचारी यांनी तर सर्व शाळा परिसरात विद्यार्थी व शिक्षकांच्या सहभागाने सकाळी १० ते ११ दरम्यान उत्स्फूर्त सहभाग नोंदविला. तसेच स्टेट बँक ऑफ इंडिया, फलटण शाखा यांनीही सहभाग नोंदवून आवश्यक साहित्यांचा पुरवठा केला.

अभियानाच्या मूळ उद्देशास अनुसरून दि. २७/०९/२०२३ रोजी फलटण नगरपरिषद प्रशासकीय इमारतीमध्ये सफाई कर्मचारी यांची आरोग्य तपासणी करून बँकामार्फत उपलब्ध असलेल्या आर्थिक योजनांची माहिती देण्यात आली.