मेव्हण्यानेच केला दाजीचा खून

कराड : बहिणीला त्रास देत असल्याच्या रागातून मेव्हण्यानेच त्याच्या दाजीचा खून केल्याची धक्कादायक घटना येथील वाखाण परिसरात घडली आहे.
गुरुवारी 28 रोजी मध्यरात्रीच्या सुमारास मजूरीचे काम करत असलेल्या दाजीचा त्याच्याच मेव्हण्याने गळा दाबून व छाती दगडाने ठेचून खून केला आहे. घटनेची नोंद शहर पोलीस ठाण्यात झाली असून याप्रकरणी पोलिसांनी एकाला अटक केली आहे.
नितीन नागेश भालशंकर (वय 21) रा. वाखान परिसर, कराड मूळ रा. वैराग ता. बार्शी, जि. सोलापूर असे खून झालेल्याचे नाव आहे. तर रवी रमेश कुडवे (वय 23, सध्या रा. वाखाण परिसर, कराड. मूळ रा. वैराग ता. बार्शी, जि. सोलापूर) असे खूनप्रकरणी पोलिसांनी ताब्यात घेतलेल्याचे नाव आहे.
याबाबत पोलिसांकडून मिळालेली माहिती अशी की, येथील वाखाण परिसरातील बर्गे मळा येथे  हॉटेल वस्तीच्या पुढे पट्टी नावच्या शिवारात सुजित जाधव यांच्या मालकीच्या भाताच्या मोकळ्या शेतात बार्शीहून कामानिमित्त आलेली मजूर कुटुंबे राहत आहेत. येथेच मयत नितीन भालशंकर हा आपल्या कुटुंबीयांसोबत राहत होता. तर तेथेच त्याचा मेहुणा रवी कुडवे हाही राहत होता. रवी कुडवे याच्या बहिणीबरोबर मयत नितीन भालशंकर याचा विवाह झाला होता.
दरम्यान, नितीन भालशंकर हा दारू पिऊन रवी कुडवे याच्या बहिणीला त्रास देत होता. याबाबत रवी कुडवे हा नितीन भालशंकर याला समजावून सांगत असतानाच त्या दोघांमध्ये वाद झाला. या वादाचे पर्यावसन भांडणात झाले. यावेळी रवी कुडवे याने नितीन भालशंकर याचा हाताने गळा दाबला. त्यामुळे नितीन बेशुद्ध पडला. त्यानंतर कुडवे याने भालशंकरच्या छातीवर दगड मारून त्याचा खून केला. घटनेनंतर संशयित रवी कुडवे शहर पोलिस ठाण्यात स्वतःहून हजर झाला. पोलिसांनी त्याला ताब्यात घेऊन घटनेची माहिती घेतली. त्यानंतर पोलीस संशयिताला घेऊन घटनास्थळी गेले व घटनेचा पंचनामा केला.
पोलिसांनी संशयित रवी कुडवे याला अटक केली आहे. घटनास्थळी वरिष्ठ पोलीस निरीक्षक बी. आर. पाटील यांनी भेट देऊन पाहणी केली. अधिक तपास पोलीस उपनिरीक्षक चोरगे करीत आहेत.