फलटण येथे नगरपालिका कडून स्वच्छता अभियान

फलटण नगर पालिकेने फलटण शहराच्या स्वच्छता अभियानामध्ये नाव येण्यासाठी कंबर कसली असून, नियोजनबद्ध स्वच्छता मोहीम विविध सामाजिक घटकांना सोबत घेऊन राबविली जात आहे. लोकांचा या मोहिमेला प्रतिसाद मिळू लागल्याने स्वच्छतेच्या बाबतीत फलटण एक पाऊल पुढे दिसू लागले आहे.

फलटण शहराची लोकसंख्या दिवसेंदिवस वाढत आहे. त्या प्रमाणात सोयी सुविधा देण्यात नगरपालिका प्रशासन यापूर्वी कमी पडत होते. स्वच्छतेसंदर्भात जनतेच्या अनेक तक्रारी होत्या. वेळेवर स्वच्छता केली जात नसल्यामुळे अनेकांनी नाराजी व्यक्त केली होती. मात्र, गेल्या सव्वा वर्षात प्रशासकीय कारभार हाती येताच मुख्याधिकारी संजय गायकवाड यांनी शहरांमध्ये स्वच्छतेला प्राधान्य दिले आहे. मुख्याधिकारी गायकवाड यांनी नियोजनबद्ध स्वच्छता मोहीम राबवण्यास सुरुवात केली आहे. विविध सामाजिक घटकांना सोबत घेऊन स्वच्छता मोहीम सुरू आहे.

फलटण नगरपालिकेने महाराष्ट्रभूषण डॉ. नानासाहेब धर्माधिकारी प्रतिष्ठान, रेवदंडा यांच्या संयुक्त विद्यमाने महाराष्ट्रभूषण डॉ. नानासाहेब धर्माधिकारी यांच्या अमृतवर्षा निमित्त महास्वच्छता अभियान राबविले. त्याला चांगला प्रतिसाद लाभला.

स्वच्छ सर्वेक्षण २०२३ अंतर्गत फलटण नगरपरिषदेने स्वच्छता श्रमदान अभियान राबविण्यासाठी बुधवारी सकाळी सुरुवात केली. जवळपास १,५०० नागरिकांचा उत्स्फूर्त सहभाग होता. श्रमदान स्वच्छता या अभियानात नगरपरिषदेचे सर्व विभागप्रमुख व अधिकारी कर्मचारी असे २०० कर्मचारी सहभागी झाले होते. तसेच नगरपरिषदेकडील १६ घंटागाड्या, १६ ट्रॅक्टर, ३ जेसीबी, ३ ट्रॅक्टर फरांडी, ३ पाणी टँकर, २ अग्निशमन, १ क्रेन यांचा वापर करण्यात आला. नागरिकांना ओला व सुका कचरा वर्गीकरण, ओल्या कचऱ्यापासून घरगुती खत निर्मिती याबाबत प्रात्यक्षिकाद्वारे माहिती देण्यात आली