पंतप्रधान मोदींची माजी खासदार रणजीतसिंह नाईक निंबाळकर यांनी घेतली भेट; माढा मतदारसंघातील विकास कामांना गती मिळणार

फलटण प्रतिनिधी : 

माढा लोकसभा मतदारसंघाचे माजी खासदार रणजीतसिंह नाईक निंबाळकर यांनी आज पंतप्रधान नरेंद्र मोदी यांची भेट घेऊन विविध विकासकामांबाबत सविस्तर चर्चा केली. या भेटीत मतदारसंघातील प्रलंबित प्रकल्पांना गती देण्याबाबत सकारात्मक निर्णय होण्याची चिन्हे दिसून आली. बैठकीदरम्यान मुंबई–हैदराबाद बुलेट ट्रेन प्रकल्पाचा मुद्दा विशेषतः उपस्थित करण्यात आला. नाईक निंबाळकर खासदार असताना या प्रकल्पास तांत्रिक मंजुरी मिळाल्याचे सांगण्यात आले. यावर पंतप्रधान मोदी यांनी तातडीने लक्ष घालत संबंधित विभागांना निर्देश दिले असून, लवकरच कॅबिनेट बैठकीत मंजुरी घेऊन पुढील कार्यवाही करण्याच्या सूचना केल्या आहेत.

याचबरोबर मुंबई–बेंगळुरू कॉरिडॉर हायवे संदर्भातही चर्चा झाली. या प्रकल्पाचा सविस्तर अहवाल सादर करण्याच्या सूचना संबंधित सचिवांना देण्यात आल्या असल्याची माहिती समोर आली आहे.

तसेच बारामती–फलटण आणि फलटण–पंढरपूर रेल्वे मार्गांच्या कामाबाबतही पंतप्रधानांनी सविस्तर माहिती घेतली. या प्रकल्पांच्या प्रगतीचा आढावा घेत पुढील कार्यवाहीसाठी आवश्यक त्या सूचना करण्यात आल्या.

दरम्यान, संसद अधिवेशन संपल्यानंतर माढा मतदारसंघातील विविध प्रलंबित प्रश्न सोडवण्यासाठी केंद्र व राज्य शासनाची संयुक्त बैठक लवकरच आयोजित करण्याचे निर्देश पंतप्रधान मोदी यांनी दिले आहेत.

या भेटीमुळे मतदारसंघातील अनेक विकासकामांना गती मिळून प्रलंबित प्रश्न मार्गी लागतील, असा विश्वास माजी खासदार रणजीतसिंह नाईक निंबाळकर यांनी व्यक्त केला.