महिलांनी फळप्रक्रिया व्यवसायाच्या माध्यमातून स्वावलंबी व उद्योजिका बनावे - आमदार सचिन पाटील

फलटण प्रतिनिधी - 

फलटण तालुक्यातील फळांचे गाव म्हणून ओळख असलेल्या धुमाळवाडी (ता. फलटण, जि. सातारा) येथील महिलांना फळप्रक्रिया उद्योग उभारणीबाबत मार्गदर्शन मिळावे या उद्देशाने महिला अभ्यास दौऱ्याचे आयोजन करण्यात आले आहे. या दौऱ्याचा शुभारंभ आज करण्यात आला असून धुमाळवाडी येथील सुमारे ४० महिला या अभ्यास दौऱ्यात सहभागी झाल्या आहेत.

मुख्यमंत्री समृद्ध पंचायत राज अभियान अंतर्गत या महिला शेतकरी अभ्यास दौऱ्याचे नियोजन करण्यात आले आहे. फळप्रक्रिया उद्योग उभारणीबाबत प्रत्यक्ष अनुभव मिळावा यासाठी वाई, पाचगणी, भिलार, मधाचेगाव मांगर तसेच महाबळेश्वर या ठिकाणी भेटी देण्याचे नियोजन करण्यात आले आहे.

या अभ्यास दौऱ्याचे उद्घाटन फलटण-कोरेगाव मतदारसंघाचे आमदार सचिन पाटील यांच्या हस्ते करण्यात आले. यावेळी बोलताना आमदार पाटील यांनी सहभागी महिलांना शुभेच्छा देत, महिलांनी फळप्रक्रिया व्यवसायाच्या माध्यमातून स्वावलंबी व उद्योजिका बनावे, असे आवाहन केले. विविध फळपिकांनुसार फळप्रक्रिया उद्योग उभारण्यासाठी हा अभ्यास दौरा महिलांसाठी अत्यंत उपयुक्त ठरेल, तसेच तालुक्यातील इतर गावांमधूनही अशा अभ्यास दौऱ्यांचे नियोजन करण्याचा मानस असल्याचे त्यांनी सांगितले.

यावेळी युवा नेते दत्तात्रय धुमाळ, हणमंत शिंदे, उपसरपंच रेखा दत्तात्रय धुमाळ, माजी उपसरपंच रुपाली जाधव, ग्रामपंचायत अधिकारी मोनिका मुळीक, सहायक कृषी अधिकारी सचिन जाधव तसेच अभ्यास दौऱ्यात सहभागी झालेल्या महिला उपस्थित होत्या.