सामाजिक कार्यकर्ते सुधीर अहिवळे (चेअरमन ) यांचा शिवसेनेत प्रवेश, फलटणच्या राजकारणात मोठी खळबळ : असंख्य कार्यकर्त्यांची उपस्थिती

फलटण प्रतिनिधी –

फलटण येथील ज्येष्ठ सामाजिक कार्यकर्ते तथा माजी नगरसेविका सौ. वैशाली सुधीर अहिवळे यांचे पती सुधीर तानाजी अहिवळे (चेअरमन) यांनी शिवसेनेत प्रवेश केला. हा प्रवेश फलटणच्या राजकीय वर्तुळात चर्चेचा विषय ठरला आहे. 

या प्रवेशप्रसंगी श्रीमंत रघुनाथराजे नाईक निंबाळकर, शिवसेना जिल्हाध्यक्ष चंद्रकांत जाधव, नगराध्यक्ष पदाचे उमेदवार ॲड. श्रीमंत अनिकेतराजे नाईक निंबाळकर, श्रीमंत विश्वजीत राजे नाईक निंबाळकर, तालुकाध्यक्ष नानासाहेब तथा पिंटू इवरे,सचिन चव्हाण, ज्ञानेश्वर पवार, निलेश तेलखडे यांच्यासह अनेक मान्यवर उपस्थित होते.

सुधीर अहिवळे यांना मोठा राजकीय वारसा लाभलेला आहे. त्यांचे वडील स्व. तानाजीराव अहिवळे हे फलटण नगरपरिषदेचे माजी उपनगराध्यक्ष होते. तसेच त्यांच्या थोरल्या वहिनी स्वाती आशिष अहिवळे यांनी अपक्ष म्हणून राजे गटाविरोधात मोठा विजय मिळवत फलटण नगरपालिकेच्या उपनगराध्यक्षा म्हणून काम केले आहे. त्यामुळे अहिवळे कुटुंबाकडे राजकीय अनुभवासोबतच जनतेच्या विश्वासाची भक्कम शिदोरी आहे.

साधारण दोन वर्षांपूर्वी सुधीर अहिवळे यांनी राजे गटाला सोडचिठ्ठी देत भारतीय जनता पक्षात प्रवेश केला होता. फलटण नगरपरिषद निवडणुकीत भाजपकडून संधी मिळेल अशी अपेक्षा असतानाही त्यांना उमेदवारी देण्यात आली नाही.

आता फलटण नगरपरिषदेची निवडणूक अगदी शेवटच्या टप्प्यावर असताना सुधीर अहिवळे यांचा शिवसेनेत प्रवेश झाल्याने शहरातील राजकीय समीकरणांमध्ये मोठा बदल होण्याची शक्यता व्यक्त केली जात आहे. या प्रवेशामुळे राजे गटाला बळ मिळाले असून, आगामी निवडणुकीत याचे पडसाद निश्चितच उमटतील, अशी चर्चा राजकीय वर्तुळात रंगली आहे.