फलटणमध्ये डी-मार्ट बांधकाम वादाच्या भोवऱ्यात

फलटण प्रतिनिधी –

फलटण तालुक्यातील फरांदवाडी व वडजल हद्दीवर उभारण्यात येत असलेल्या डी-मार्टच्या बांधकामाबाबत वाद निर्माण झाला आहे. संबंधित बांधकाम कोणतीही शासकीय परवानगी न घेता उभारण्यात आल्याचा आरोप फरांदवाडीचे उपसरपंच यांनी केला असून, या संदर्भात त्यांनी तहसीलदार डॉ. अभिजित जाधव यांना लेखी निवेदन दिले आहे.

निवेदनात नमूद केल्याप्रमाणे, हे बांधकाम शेतकऱ्यांच्या दृष्टीने नुकसानकारक ठरत असून भविष्यात जीवितहानी होण्याची शक्यता नाकारता येत नाही. शेतकऱ्यांसाठी असलेल्या रस्त्याच्या बाजूला नियमांनुसार सहा फूट जागा मोकळी ठेवणे बंधनकारक असताना, संबंधित कंपनीने रस्त्यालगतच कंपाऊंडची भिंत उभारली आहे. यामुळे ऊस किंवा इतर पिकांची वाहतूक करताना वाहनांना वळण घेण्यासाठी किंवा बाहेर पडण्यासाठी पुरेशी जागा उरत नसल्याने मोठा अपघात होण्याची शक्यता निर्माण झाली आहे. या पार्श्वभूमीवर, संबंधित भिंत तात्काळ हटवून रस्त्यालगत सहा फूट जागा मोकळी ठेवण्याची मागणी उपसरपंचांनी केली आहे.

दरम्यान, या प्रकरणाची प्रशासनाकडून चौकशी करून योग्य ती कारवाई करण्यात यावी, अशी मागणी स्थानिक शेतकरी वर्गातूनही होत आहे.