फलटण मध्ये शिवजयंती वरून रणकंदन : कोण साजरी करणार शिवजयंती ?

राजकारण विरहित सर्व जाती - धर्मातील घटकांना एकत्रिक घेत फलटणची शिवजयंती होणार :  समशेरबहाद्दर नाईक निंबाळकर, माजी विरोधी पक्षनेते, फलटण नगर परिषद, फलटण 

फलटण तालुक्याच्या यंदाच्या शिवजयंती उत्सव समिती अध्यक्षपदी सातारा जिल्हा परिषदेचे माजी अध्यक्ष तथा महाराष्ट्र खो -खो असोसिएशनचे अध्यक्ष फलटण तालुक्याचे नेते श्रीमंत संजीवराजे नाईक निंबाळकर यांची एकमताने निवड केली असून सदरची बैठक लक्ष्मी विलास पॅलेस निवासस्थानी आयोजित करण्यात आली होती. यावेळी फलटण तालुक्यातील सर्वांनी मिळून यावर्षी एकच शिवजयंती साजरी करण्याचाही निर्णय घेण्यात आला असल्याची बातमी प्रकाशित झाल्यानंतर भारतीय जनता पार्टीचे माढा लोकसभा मतदार संघाचे खासदार रणजितसिंह नाईक निंबाळकर यांचे निकटवर्तीय व फलटण नगर परिषदेचे माजी नगरसेवक अशोकराव जाधव यांनी सोशल मीडियाच्या माध्यमातून छत्रपती शिवाजी महाराजांची जयंती २२ एप्रिल रोजी फलटण तालुक्यातील सर्व समाज बांधव यांना बरोबर घेऊन साजरी करण्यात येणार असून त्या बाबत विचार विनिमय बैठक दिनांक 8/4/2023 रोजी ठीक 4 वाजता स्थळ - रेस्ट हाऊस, सार्वजनिक बांधकाम विभाग फलटण येथे होणार असल्याचा मेसेज केला व पुन्हा एकदा शिवजयंती उत्सव नक्की कोण करणार अशी चर्चा फलटण शहरात सुरु झाली आहे. 

छत्रपती शिवाजी महाराज यांच्या जयंतीनिमित्त संपूर्ण फलटण तालुक्याच्यावतीने फलटणमध्ये एकच शिवजयंती साजरी करण्यात येते. मागील वर्षी फलटण तालुक्यातील सर्वांनी मिळून यावर्षी एकच शिवजयंती साजरी करण्याचा निर्णय घेतला होता त्यानुसार मागील वर्षी शिवजयंती उत्सवाच्या अध्यक्षस्थानी संजीवराजे नाईक निंबाळकर यांची निवड करण्यात आली होती. यावर्षीही पुन्हा श्रीमंत संजीवराजे यांची निवड एकमताने झाल्याचे सोशल मीडियाच्या माध्यमातून प्रिंट व डिजिटल मीडियातील पत्रकारांना माहिती देण्यात आली होती.

मात्र शनिवारी सार्वजनिक बांधकाम विभागाच्या फलटण येथे विश्रामगृह या ठिकाणी झालेल्या बैठकीत शिवजयंती उत्सव फलटण तालुक्याच्या वतीने करणार असल्याचे फलटण नगर परिषदेचे माजी विरोधी पक्षनेते समशेरबहाद्दर नाईक निंबाळकर यांनी यांनी जाहीर केले. राजकारण विरहित सर्व जाती - धर्मातील घटकांना एकत्रिक घेत फलटणची शिवजयंती होणार असल्याचे यावेळी समशेरबहाद्दर नाईक निंबाळकर यांनी यावेळी स्पष्ट केले. या बैठकीच्या वेळी अनेक सामाजिक संघटना यांच्या सह अनेक वैयक्तिक देणगीदारांनी देणगी जाहीर करत शिवजयंतीस आपला पाठिंबा दर्शविला.

 राजकीय गट -तट विसरून सर्वांनी एकत्र जयंती करणे अपेक्षित असल्याचा सुरु विश्रामगृह येथे झालेल्या बैठकीत निघाल्याचे दिसून आले. या बैठकीमध्ये फलटण तालुक्यातील विविध जातीधर्माचे विविध राजकीय पक्षांचे मान्यवर पदाधिकारी उपस्थित होते.

 फलटण तालुक्याच्या वतीने फलटण शहरामध्ये साजरी होणाऱ्या शिवजयंती सोहळ्याची कार्यकारिणी लवकरच सर्वानुमते जाहीर होईल - अशोकराव जाधव, माजी नगरसेवक, फलटण नगर परिषद, फलटण.