उमेदवाराच्या प्रचारात कर्मचाऱ्यांची रेलचेल : मतदार-कार्यकर्त्यांची वाणवा

फलटण प्रतिनिधी :

फलटण नगरपरिषद निवडणुकीत वातावरण तापू लागले असून विविध प्रभागांमध्ये प्रचाराने वेग घेतला आहे. काही ठिकाणी कार्यकर्ते आणि नागरिकांचा उत्स्फूर्त सहभाग दिसत असताना एका प्रभागात मात्र चित्र याच्या उलट पाहायला मिळत आहे.

स्वतःला सुशिक्षित, प्रगत आणि उच्चभ्रू राजकीय घराण्याची ओळख निर्माण करणाऱ्या एका बड्या नेत्याच्या सुनेला या प्रभागातून उमेदवारी मिळाली आहे. मात्र त्यांच्या प्रचाराची सुरुवात होताच चर्चा रंगू लागल्या आहेत.

कारण प्रचार मोहिमेत त्या प्रभागातील पक्षाचे कार्यकर्ते, मतदार किंवा स्थानिक नागरिकांचा सहभाग फारसा दिसत नसून त्या बड्या नेत्याच्या मालकीच्या विविध संस्थांमध्ये काम करणारे कर्मचारी मोठ्या प्रमाणावर प्रचारात गुंतल्याचे चित्र दिसत आहे. त्यांच्या हातात बॅनर्स, रिबन्स आणि पक्षाचे चिन्ह असलेली पोस्टर्स दिसत आहे.

या प्रचारात स्थानिकांचा सहभाग नसल्याने अनेक मतदारांमध्ये नाराजीचे सूर दिसत आहेत. "मतदार संपर्काऐवजी कर्मचारी मोर्चा हा प्रचार की शोभेचा कार्यक्रम?" असा सवाल मतदारांमध्ये चर्चेत आहे. तर अनेक ठिकाणी कर्मचाऱ्यांना पाहताच जनतेकडून दरवाजा बंद केला जात असल्याचे बोलले जात आहे. 

दरम्यान, या घटनेमुळे सोशल मीडियावरही टीका सुरू झाली आहे. शहरातील ज्येष्ठ नागरिकांचे असे म्हणणे आहे की, "प्रभागातील समस्या जाणणारे आणि लोकांशी नाळ जुळणारे उमेदवार हवेत, वरून लादलेले नको"

आता या प्रभागातील मतदार खऱ्या अर्थाने उमेदवाराला स्वीकारतात की हा प्रचार फक्त संस्थात्मक कर्मचाऱ्यांपुरता मर्यादित राहतो, हे पाहणे उत्सुकतेचे ठरणार आहे.

निवडणुकीतील ही चर्चा आता शहरभर व्हायरल झाली असून मतदारांनी या ‘कर्मचारी आधारित प्रचाराला’ कसकसा प्रतिसाद देणार, याकडे सर्वांचे लक्ष लागले आहे.