फलटण ग्रामीण पोलिसांची धडाकेबाज कारवाई; २ गावठी पिस्टल, काडतूसांसह ४ आरोपी जेरबंद

फलटण प्रतिनिधी : 

फलटण ग्रामीण पोलिसांनी अवैध शस्त्र बाळगणाऱ्यांविरोधात मोठी कारवाई करत दोन गावठी पिस्टल, एक जिवंत काडतूस, पल्सर मोटारसायकल व मोबाईलसह सुमारे २ लाख ५० हजार ३०० रुपयांचा मुद्देमाल जप्त केला असून चार आरोपींना अटक करण्यात आली आहे.

दि. ५ जून २०२६ रोजी पोलीस निरीक्षक राजकुमार भुजबळ यांना गोपनीय माहिती मिळाली की, रेकॉर्डवरील गुन्हेगार प्रतीक प्रमोद खुंटे (रा. मांडकी, ता. पुरंदर, जि. पुणे) हा आपल्या साथीदारासह गावठी पिस्टल घेऊन दुधेबावी (ता. फलटण) परिसरात येणार आहे. या माहितीच्या आधारे गुन्हे प्रकटीकरण पथकाला छापा टाकण्याचे आदेश देण्यात आले.

दुधेबावी गावाच्या हद्दीत संशयित इसम पल्सर मोटारसायकलवरून जात असताना पोलिसांनी त्यांचा पाठलाग केला. फलटण-दहिवडी मार्गावर पळून जाण्याचा प्रयत्न करणाऱ्या आरोपींना शिताफीने पकडण्यात आले. अटक करण्यात आलेल्या आरोपींमध्ये प्रतीक प्रमोद खुंटे (वय २५) व प्रदीप उर्फ सोन्या संतोष गोरे (वय २१, रा. काळुबाईनगर, साखरवाडी) यांचा समावेश आहे.

झडतीदरम्यान प्रतीक खुंटे याच्याकडून एक गावठी पिस्टल व एक जिवंत काडतूस जप्त करण्यात आले. पुढील चौकशीत आणखी एक गावठी पिस्टल करण कानिफ घोलप (रा. मंगळवार पेठ, फलटण) याला समीर उर्फ वर्धन बाळासो खवळे (रा. मांडवखडक, ता. फलटण) यांच्या मदतीने विकल्याची माहिती समोर आली. त्यानुसार पोलिसांनी संबंधित आरोपींना ताब्यात घेऊन दुसरे पिस्टलही जप्त केले.

या कारवाईत एकूण चार आरोपींना अटक करण्यात आली असून त्यांच्याकडून २ गावठी पिस्टल, १ जिवंत काडतूस, १ पल्सर मोटारसायकल आणि ३ मोबाईल फोन असा एकूण २,५०,३०० रुपयांचा मुद्देमाल जप्त करण्यात आला आहे.

तपासादरम्यान अटक आरोपींपैकी प्रतीक खुंटे व करण घोलप यांच्यावर यापूर्वीही खूनाचा प्रयत्न, मारहाण, धमकी व इतर गंभीर स्वरूपाचे गुन्हे दाखल असल्याचे निष्पन्न झाले आहे.

ही कारवाई पोलीस अधीक्षक निखिल पिंगळे, अपर पोलीस अधीक्षक वैशाली कडूकर व उपविभागीय पोलीस अधिकारी विशाल खांबे यांच्या मार्गदर्शनाखाली पोलीस निरीक्षक राजकुमार भुजबळ यांच्या नेतृत्वाखाली करण्यात आली. गुन्हे प्रकटीकरण शाखेचे पोलीस उपनिरीक्षक दीपक पवार यांच्यासह नितीन चतुरे, अमोल जगदाळे, श्रीनाथ कदम, हणुमंत दडस, सुरज काकडे, गणेश यादव, विक्रम बनकर, तुषार नलवडे आणि अमोल देशमुख यांनी या कारवाईत सहभाग घेतला.