कोळकीत साखळी चोरट्यांचा धुमाकूळ; महिलेच्या गळ्यातील दोन तोळ्यांची चैन व मंगळसूत्र लंपास

फलटण दि. 4 एप्रिल 2026

फलटण शहरालगत असलेल्या कोळकी परिसरात पुन्हा एकदा साखळी चोरट्यांनी धुमाकूळ घातल्याची घटना उघडकीस आली आहे. येथील महादेव माळ परिसरामध्ये सायंकाळच्या सुमारास फिरायला गेलेल्या एका महिलेच्या गळ्यातील सुमारे दोन तोळ्यांची सोन्याची चैन तसेच मनी मंगळसूत्र चोरट्यांनी हिसकावून नेल्याची धक्कादायक घटना घडली.

मिळालेल्या माहितीनुसार, संबंधित महिला नेहमीप्रमाणे सायंकाळी फिरण्यासाठी बाहेर पडल्या होत्या. याच वेळी दुचाकीवरून आलेल्या अज्ञात चोरट्यांनी क्षणार्धात त्यांच्या गळ्यातील दागिने हिसकावून घटनास्थळावरून पलायन केले. अचानक घडलेल्या या प्रकारामुळे परिसरात भीतीचे वातावरण निर्माण झाले आहे.

सदर घटनेनंतर नागरिकांमध्ये संतापाची लाट उसळली असून, फलटण शहर व उपनगरांमध्ये वाढत्या चोऱ्यांच्या घटनांमुळे कायदा व सुव्यवस्थेचा प्रश्न पुन्हा ऐरणीवर आला आहे. चोरट्यांनी अक्षरशः ‘हाऊसफुल’ केल्यासारखी परिस्थिती निर्माण केली असून, पोलीस प्रशासनाचा कोणताही धाक उरला नसल्याची भावना नागरिकांत व्यक्त होत आहे.

स्थानिक नागरिकांनी पोलिसांनी तातडीने गस्त वाढवावी, सीसीटीव्ही तपासणी करून आरोपींना लवकरात लवकर अटक करावी, तसेच महिलांच्या सुरक्षेसाठी ठोस उपाययोजना कराव्यात, अशी मागणी केली आहे. दरम्यान, या प्रकरणी पोलिसांकडून तपास सुरू असून गुन्हा नोंद करण्याचे काम सुरु आहे.