आंतरराज्य मोटार सायकल चोरट्यास अटक

कराड : आंतरराज्य मोटार सायकल चोरट्याला ताब्यात घेण्यात कराड शहर पोलीस ठाणे गुन्हे प्रकटीकरण शाखेला यश आले आहे. त्याच्याकडून चोरीच्या 16 मोटार सायकल जप्त करण्यात आल्या आहेत.
अजित भगवान खरात (वय 19, रा. लेंगरेवाडी, पो. मारूगडे, ता.आटपाडी, जि.सांगली, सध्या रा. उजाला चौकी, सरकेज, अहमदाबाद, राज्य गुजरात) असे ताब्यात घेण्यात आलेल्या संशयिताचे नाव आहे.
कराड शहर पोलीस ठाणे हद्दीत मोटार सायकल चोरीने डोके वर काढले होते. मोटार सायकल चोरीला आळा घालण्यासाठी पोलीस अधीक्षक अजयकुमार बन्सल यांनी सुचना दिलेल्या होत्या. त्यानुसार अपर पोलीस अधीक्षक अजीत बोऱ्हाडे, कराडचे उपविभागीय पोलीस अधिकारी डॉ.रणजीत पाटील व कराड शहर पो.ठाण्याचे वरिष्ठ पेालीस निरीक्षक बी.आर.पाटील यांच्या मार्गदर्शनाखाली कराड शहर पोलीस ठाणे हद्दीत होणाऱ्या मोटार सायकल चोरीच्या गुन्ह्यांना प्रतिबंध होवून ते उघड करण्याकरीता गुन्हे प्रकटीकरण शाखेकडून विशेष पथक तयार करण्यात आलेले होते. हे पथक कराड शहर पो.ठाणे हद्दीत व परिसरात मोटार सायकल चोरांचा शोध घेत असताना गुन्हे प्रकटीकरण शाखेचे पोलीस अंमलदार संतोष सपाटे व नितीन येळवे हे कराड शहरात पेट्रोलिंग करत असताना त्यांना एक गोपनीय बातमीदारामार्फत माहिती मिळाली.
त्या माहितीवरून एक संशयीत इसम कराड बसस्थानक परिसरातून ताब्यात घेतला. त्यास त्याचे नाव गाव विचारले असता प्रथम त्याने उडवाउडवीची उत्तरे दिली. त्यास गुन्हे प्रकटीकरण शाखेत आणून वरिष्ठांच्या मार्गदर्शनाखाली सपोनि अमित बाबर यांनी कौलशल्यपुर्ण तपास केला असता त्याने एकुण 16 मोटार सायकल चोरी केल्याचे कबुल केले. त्या त्याचेकडून जप्त करण्यात आल्या आहेत. आरोपी याने कराड शहरातून 07, विटा जिल्हा सांगली येथून 03, कासा जिल्हा पालघर येथून 01 तसेच अहमदाबाद राज्य गुजरात येथून 05 अशा एकुण 5 लाख 58 हजार रुपये किंमतीच्या 16 मोटार सायकल चोरल्याचे निष्पन्न झालेले आहे.
या गुन्ह्याच्या तपासामध्ये आरोपी हा एस.टी.बसने वेगवेगळया शहरात जावून बसस्थानक परिसरात लोकांनी पार्क केलेल्या स्प्लेंडर, एचफ डिलक्स व शाईन मोटार सायकल अशा गाड्या टार्गेट करून त्यांचेकडील मास्टर की ने हॅण्डल लॉक काढून चालु करत होता. गाडीची नंबर प्लेट काढून ग्राहक शोधून कोरोना मुळे पेपर ट्रान्स्फर होण्यास वेळ लागत आहे असे सांगून गाड्याची विक्री करत होता. गाड्या चोरून विकून मिळालेल्या पैशातून मौजमजा करत होता.
ही कामगिरी पोलीस अधीक्षक अजयकुमार बन्सल, अपर पोलीस अधीक्षक अजित बोऱ्हाडे, उपविभागीय पोलीस अधिकारी डॉ. रणजीत पाटील व कराड शहर पोलीस ठाण्याचे वरिष्ठ पोलीस निरीक्षक बी.आर.पाटील यांच्या मार्गदर्शनाखाली गुन्हे प्रकटीकरण शाखेचे प्रमुख अमित बाबर, सहा.पोलीस निरीक्षक कराड शहर पो.ठाणे, पोउपनि अशोक भापकर, सफौ संतोष सपाटे, सतीश जाधव, पोलीस हवालदार जयसिंग राजगे, नितीन येळवे, मनोज शिंदे पोलीस नाईक संजय जाधव, सचिन साळुंखे, संदीप कुंभार, मारुती लाटणे, प्रफुल्ल गाडे, आनंदा जाधव, संग्राम पाटील, सुजीत दाभाडे यांनी केलेली आहे.