समशेरसिंह नाईक निंबाळकर यांच्यासह अशोकराव जाधव व स्वाती भोसले यांना मताधिक्य देणार - सामाजिक कार्यकर्ते शरद दीक्षित

फलटण प्रतिनिधी :

फलटण नगरपालिका निवडणुकीच्या पार्श्वभूमीवर प्रभाग क्रमांक ७ मधून मताधिक्य देणार असल्याची घोषणा सामाजिक बांधिलकीसाठी ओळखले जाणारे शरद दीक्षित यांनी केली आहे. नगराध्यक्ष पदासाठी समशेरसिंह नाईक निंबाळकर यांना आणि नगरसेवक पदासाठी अशोकराव जाधव व सौ. स्वाती राजेंद्र भोसले यांना त्यांनी उघडपणे समर्थन दिले आहे.

 माजी खासदार कैलासवासी लोकनेते हिंदुराव नाईक निंबाळकर यांनी आपले संपूर्ण जीवन जनसेवेसाठी अर्पण केले होते. तर माजी खासदार रणजितसिंह नाईक निंबाळकर यांनी मतदारसंघासाठी केलेले काम एकूणच लक्षवेधी आहे. अगदी त्यांचप्रमाणे भाजपाचे नगराध्यक्षपदाचे उमेदवार समशेरसिंह नाईक निंबाळकर हे सुद्धा धाडसी नेतृत्व आहे.

शरद दीक्षित यांनी सांगितले की, शहरात खऱ्या अर्थाने विकासात्मक राजकारणाची गरज आहे. गेली काही वर्षे शहरातील मूलभूत सोयी-सुविधांमध्ये ठोस सुधारणा न झाल्याने नागरिकांमध्ये नाराजी आहे. पाणीपुरवठा, रस्ते, ड्रेनेज, आरोग्य, कचरा व्यवस्थापन, शैक्षणिक सुविधा आणि सुरक्षितता या सर्वच मुद्द्यांवर धोरणात्मक काम करणारे लोकप्रतिनिधी असणे आवश्यक असल्याचे त्यांनी नमूद केले.

समशेरसिंह नाईक निंबाळकर यांच्या नेतृत्वावर विश्वास व्यक्त करताना दीक्षित म्हणाले की,

“शहराला नवे नेतृत्व हवे आहे. निर्णयक्षम, विकासाभिमुख आणि युवा विचाराने काम करणाऱ्या नेतृत्वानेच फलटणला दिशा मिळेल. समशेरसिंह हे त्या भूमिकेसाठी योग्य आहेत.”

नगरसेवक पदासाठी अशोकराव जाधव व सौ. स्वाती भोसले यांची निवड ही प्रभागातील स्थानिक प्रश्न सोडविण्यासाठी महत्त्वाची असल्याचे त्यांनी सांगितले. दोन्ही उमेदवारांनी प्रभागातील पाणी, रस्ते, स्वच्छता, स्ट्रीटलाइट, महिला-सुरक्षा अशा मुद्द्यांवर ठोस योजना मांडल्या आहेत.

शहरातील सुविधांचे सुधारीकरण हे केंद्रबिंदू असून, विशेषत नागरिक सेवांचा डिजिटल अपग्रेड, जलव्यवस्थापनात शाश्वत उपाय, महिलांसाठी सुरक्षित वातावरण, युवा आणि महिलांसाठी रोजगाराधारित योजना, वाहतूक व पार्किंग व्यवस्थेचे नियोजन, समतोल विकासास प्राधान्य, अशा विविध योजनांसह लोकांचा विश्वास जिंकण्याचा काम भाजपा व राष्ट्रवादी काँग्रेस अजित पवार पक्षा कडून होईल असा आशावाद दीक्षित यांनी व्यक्त केला आहे.

प्रभाग ७ मधील वाढते समर्थन आणि शरद दीक्षित यांचा खुला पाठिंबा यामुळे या उमेदवारीकडे शहराचे लक्ष वेधले गेले आहे. आगामी निवडणुकीत प्रभाग ७ मधून भाजपाला मोठ्या मताधिक्याची शक्यता व्यक्त होत आहे.