फलटण पंचायत समिती सभापतीपदावरून वाद ? : ओबीसी आरक्षणावर मराठा उमेदवार निवडल्याची चर्चा ? तालुक्यातील ओबीसी नेते मोठा राजकीय भूकंप घडविणार ?

फलटण : सचिन मोरे 

 फलटण पंचायत समितीच्या सभापती पदावरून तालुक्यात राजकीय चर्चा रंगू लागल्या आहेत. सदर सभापतीपद हे ओबीसी समाजासाठी आरक्षित असल्याचे सांगितले जात असताना, मराठा-कुणबी समाजातील विक्रम भोसले यांची कन्या कु. शिवांजली विक्रम भोसले यांची सभापतीपदी निवड झाल्याने तालुक्यातील ओबीसी समाजात नाराजीचे वातावरण असल्याची चर्चा सुरू आहे.

या निवडीमुळे काही सामाजिक व राजकीय कार्यकर्त्यांनी नाराजी व्यक्त केली असून, आरक्षणाच्या मूळ उद्देशावर प्रश्नचिन्ह उपस्थित केले जात आहे. ओबीसी समाजासाठी आरक्षित पदावर इतर समाजातील व्यक्तीची निवड कशी झाली, याबाबत तालुक्यात विविध स्तरावर चर्चा होत असल्याचे चित्र दिसत आहे.

दरम्यान, मराठा आरक्षण आंदोलनाचे नेते मनोज जरांगे पाटील यांनी अनेक वेळा मराठा समाजाला नोकरी व शिक्षणासाठी आरक्षण आवश्यक असून राजकीय आरक्षणाची मागणी नसल्याचे मत व्यक्त केले होते. मात्र फलटण पंचायत समितीच्या सभापतीपदाच्या निवडीमुळे राजकीय आरक्षणावरही मराठा-कुणबी समाजाचा प्रभाव वाढत असल्याची टीका काही ओबीसी कार्यकर्त्यांकडून केली जात आहे.

या घडामोडींमुळे फलटण तालुक्यातील राजकीय वातावरण तापले असून पुढील काळात यावर अधिक चर्चा आणि भूमिका स्पष्ट होण्याची शक्यता व्यक्त केली जात आहे.

फलटण तालुक्यातील खरा ओबीसी समाज या निर्णयाने नाराज असून विविध समाजाचे ओबीसी नेते एकत्र येऊन नवीन राजनीती ठरवण्याच्या तयारीत असल्याचे बोलले जात आहे. या संदर्भात अनेकांची फोनाफोणी सुरू असून लवकरच मोठा निर्णय होण्याची शक्यता नाकारता येत नाही. 

 तालुक्यातील अनेक ओबीसी नेत्यांनी विविध पक्षांच्या पदावरून राजीनामा देण्याची चर्चा सुरु असल्याचे सांगितले आहे. त्यामुळे येणाऱ्या काही दिवसांमध्ये तालुक्यामध्ये मोठी राजकीय घडामोड घडण्याची शक्यता नाकारता येत नाही.