निंभोरे येथे सख्ख्या भाऊ-बहिणीचा खून : संशयिताला १० तासात फलटण पोलिसांनी केली अटक

फलटण प्रतिनिधी - आळंदी-पंढरपूर राष्ट्रीय महामार्गावरील (पालखी महामार्ग) निंभोरे, ता. फलटण येथे सुमित तुकाराम शिंदे, वय २० व शीतल तुकाराम शिंदे उर्फ शीतल रणजित फाळके, वय ३५ या बहीण-भावाचा निघृण खून करण्यात आला. या दुहेरी खून प्रकरणातील संशयिताला फलटण ग्रामीण पोलिसांनी केवळ १० तासांमध्येच अटक केली.

चारित्र्याच्या संशयावरून हे खून झाल्याचे तपासात समोर आले असून या प्रकरणातील संशयित रणजित मोहन फाळके, मूळ रा. सातारारोड, ता. कोरेगाव यास पोलिसांनी ताब्यात घेतले आहे. निंभोरे, ता. फलटण येथे पालखी महामार्गालगत असलेल्या झोपडीवजा घरात शीतल व सुमित हे बहीण-भाऊ त्यांच्या आई वडिलांसमवेत राहत होते. त्यांच्या समवेत शीतल व रणजित फाळके हे पती-पत्नीप्रमाणे रहात होते. शनिवारी सकाळी ६.१५ च्या सुमारास पालखी महामार्गालगत सुमित तुकाराम शिंदे व शीतल तुकाराम शिंदे उर्फ शीतल रणजित फाळके या बहीण भावाचा धारदार शस्त्राने वार करून निघृण खून करण्यात आल्याचे निदर्शनास आल्यानंतर संपूर्ण तालुक्यात खळबळ उडाली. या खुनाची माहिती मिळताच उपविभागीय पोलीस अधिकारी राहुल धस, फलटण ग्रामीण पोलीस ठाण्याचे पोलीस निरीक्षक सुनील महाडिक हे फौजफाट्यासह घटनास्थळी दाखल झाले. घटनेचा तपास करत असताना मृत शीतल हिने २ वर्षापूर्वी पहिल्या नवऱ्यास सोडून दिले होते. त्यानंतर ती रणजित फाळके याच्यासमवेत निंभोरे येथे तिच्या आई- वडिलांजवळ त्यांच्या झोपडीत राहत होती. घटना घडली त्यावेळी रात्री फाळके हा त्यांच्यासमवेत झोपडीत झोपला होता. सकाळी मृतदेह मिळाल्यानंतरही तो तिथेच फिरत होता. परंतु घटनास्थळी पोलीस आल्याचे पाहून त्याने तेथून काढता पाय घेतला. ही बाब पोलिसांच्या लक्षात येताच त्यांनी मोबाइल लोकेशनच्या आधारे त्यास सातारारोड येथून ताब्यात घेतले. त्याची चौकशी केली असता सुरुवातीस त्याने पोलिसांची दिशाभूल करण्याचा प्रयत्न केला. परंतु पोलिसी खाक्या दाखविताच त्याने दि. २५ मे रोजी मध्यरात्री शीतल ही परपुरुषाबरोबर कोठेतरी जात असल्याचे दिसल्यामुळे मी झोपडीतील चाकू घेऊन तिच्या मागे गेलो. काही अंतरावर गेल्यानंतर शीतलला गाठून मी तिच्या छातीत चाकूने वार करून तिचा खून केला. त्यावेळी तिच्यासमवेत असलेला तिचा भाऊ सुमित शिंदे यास अंधारात न ओळखल्यामुळे तो परपुरुष आहे, असा गैरसमज होऊन आपण त्याच्याही छातीत चाकू खुपसून त्याचाही निघृण खून केल्याची कबुली दिली. या प्रकरणी रणजित फाळके याच्यावर कलम ३०२ नुसार खुनाचा गुन्हा दाखल करण्यात आला आहे. फाळके हा खुल्या प्रवर्गातील असल्याचे निष्पन्न झाल्यानंतर ॲट्रॉसिटी कायद्यातील कलमांची वाढ करण्यात आली. पोलिसांनी फाळके यास अटक केली आहे.

सदर तपास पोलीस प्रमुख समीर शेख, अप्पर पोलीस अधीक्षक आँचल दलाल, उपविभागीय पोलीस अधिकारी राहुल धस यांच्या मार्गदर्शनाखाली पोलीस निरीक्षक अरुण देवकर, पोलीस निरीक्षक सुनील महाडिक व सहकारी पोलीस अधिकारी व कर्मचाऱ्यांनी या गुन्ह्याचा छडा लावत संशयिताला जेरबंद केले आहे.