इतरांचे अतिक्रमण काढणारी पालिका स्वतःच नियमभंगात? रस्त्याच्या मध्यभागी फलक लावल्याने नागरिकांमध्ये नाराजी

फलटण प्रतिनिधी

शहरातील रस्त्यांवरील अतिक्रमण हटविण्यासाठी कारवाई करणाऱ्या फलटण नगरपालिकेनेच चक्क रस्त्याच्या मध्यभागी साईन बोर्ड फलक उभारल्याने नागरिकांमध्ये आश्चर्य व नाराजी व्यक्त होत आहे. वाहतुकीस अडथळा निर्माण होईल अशा ठिकाणी लावण्यात आलेल्या या फलकामुळे नगरपालिकेच्या भूमिकेवर प्रश्नचिन्ह उपस्थित केले जात आहे.

फलटण शहरातील अनेक व्यावसायिकांनी दुकानांसमोर लावलेले जाहिरात फलक, साईन बोर्ड आणि इतर अतिक्रमणे नगरपालिका प्रशासनाने यापूर्वी हटविली आहेत. रस्त्यावरील अडथळे दूर करून वाहतूक सुरळीत करण्याचा उद्देश असल्याचे प्रशासनाकडून सांगितले जात होते. मात्र, आता नगरपालिकेच्या मुख्य प्रवेशद्वारासमोरच रस्त्याच्या मध्यभागी फलक उभारण्यात आल्याने नागरिकांमध्ये संताप व्यक्त होत आहे.

"नियम सर्वांसाठी समान असावेत. व्यावसायिकांवर कारवाई करणाऱ्या पालिकेने स्वतःच्या बाबतीतही तेच निकष लावले पाहिजेत," अशी प्रतिक्रिया काही नागरिकांनी दिली. संबंधित फलकामुळे वाहनचालकांना अडचणींचा सामना करावा लागत असून अपघाताचा धोका वाढू शकतो, अशीही चिंता व्यक्त करण्यात येत आहे.

नगरपालिकेने स्वतः उभारलेला हा फलक तातडीने हटवून नागरिकांसमोर स्पष्टीकरण द्यावे, अशी मागणी शहरातील नागरिकांकडून होत आहे. नगरपालिकेच्या या कृतीची शहरभर चर्चा सुरू असून "दुसऱ्यांसाठी एक नियम आणि स्वतःसाठी दुसरा नियम" अशी टीकाही होत आहे.