तब्बल दोन वर्षानंतर फलटणचा श्रीराम रथोस्तव मोठया उत्साहात

तब्बल दोन वर्षानंतर फलटणचा श्रीराम रथोत्सव उत्साहात पार पडला हजारो भाविकांच्या उपस्थितीत श्रीरामरथ नगर प्रदक्षिणेसाठी  भावमय वातावरणात निघाला. या वर्षीचा रथउत्सव उत्साहात पार पडल्याचे चित्र शहरात प्रकर्षाने जाणवत होते यात्रेचा आजचा मुख्य दिवस होता.    संस्थान काळापासून  सुरू असलेली येथील ऐतिहासिक   प्रभू श्रीराम रथोत्सव यात्रा  यावर्षीही  फलटणसह राज्याच्या विविध भागातून आलेल्या हजारो श्रीराम भक्तांच्या उपस्थितीत परंपरागत पध्दतीने मोठ्या भक्तिपूर्ण वातावरणात पार पडली.

 नाईक-निंबाळकर राजघराण्यातील साध्वी श्रीमंत सगुणामाता आईसाहेब यांनी सुमारे 250 वर्षांपूर्वी रथयात्रेची सुरू केलेली परंपरा आजही परंपरागत पध्दतीने सुरू आहे. दरवर्षी मार्गशीर्ष शुध्द प्रतिपदेला म्हणजे देवदिवाळीच्या दिवशी  प्रभू श्री रामाची सजविलेल्या रथातून नगर प्रदक्षिणा होते. आज गुरुवार दि .२४  रोजी सकाळी नाईक-निंबाळकर देवस्थान ट्रस्टचे विश्वस्त  संजीवराजे नाईक-निंबाळकर यांच्या हस्ते रथाचे विधिवत पूजन झाले. यावेळी श्रीमंत सौ.शिवांजलीराजे , श्रीमंत सत्यजीतराजे श्रीमंत विश्वजीतराजे श्रीमंत अरूणाराजे   ,कर्नल विनोद मारवाह , उपविभागीय पोलीस अधिकारी तानाजी बरडे ,तहसिलदार समीर यादव आदी मान्यवर उपस्थित होते प्रभू श्रीराम, सीता मातेच्या मूर्ती रथामध्ये ठेवून त्यांची विधिवत पूजा व आरती करण्यात आल्यानंतर फळे, फुले, पाने आणि विविधरंगी निशाणे लावून उसाच्या मोळ्या बांधून सजविलेला हा रथ नगर प्रदक्षिणेसाठी मार्गस्थ झाला.

राम मंदिरापासून नगरप्रदक्षिणेसाठी निघालेल्या या रथाचे शिंपी गल्लीतून बारामती चौक मार्गे  नगरपरिषद कार्यालया-समोरील चौकात आगमन झाले यावेळी नगरपालिकेतील अधिकारी व कर्मचाऱ्यांनी प्रभू श्री रामाचे दर्शन घेतले. त्यानंतर रथयात्रा ज्ञानेश्वर मंदिर, प. पू. गोविंद महाराज उपळेकर मंदिर, डेक्कन चौक, म. फुले चौक, मारवाड पेठ मार्गाने बारस्कर चौक, रंगारी महादेव मंदिरापासून बाणगंगा नदीपात्र, मलठण भागातील सद्‌गुरू हरीबुवा मंदिरापासून फिरत गजानन चौक  या मार्गाने सायंकाळी पुन्हा  श्रीराम मंदिरासमोरील रथखाण्यात पोहोचला.दरम्यान, रथ प्रदक्षिणेच्या मार्गावर ग्रामीण भागातून मोठ्या संख्येने आलेल्या भाविकांनी प्रभू श्रीरामाचे शहरात ठिकठिकाणी मोठ्या भक्तिभावाने दर्शन घेतले. शहरवासीयांनी रथमार्गावर सडा रांगोळ्या घालून प्रभू श्री रामाचे स्वागत केले. त्याचप्रमाणे ठिकठिकाणी थांबून शहरवासीय आणि ग्रामीण भागातील तसेच परगावच्या भक्त मंडळींनी प्रभू श्रीरामाचे दर्शन घेतले. या रथोत्सवासाठी बारामती, इंदापूर, पुरंदर, खंडाळा, माण, खटाव, कोरेगाव या तालुक्यातून भाविक मोठ्या संख्येने आले होते. नोकरी व्यवसायानिमित्त पुणे, मुंबई आणि अन्य शहरात असलेले येथील रहिवासीही आपल्या कुटुंबीयांसह रथयात्रेसाठी आणि प्रभू श्री रामाच्या दर्शनासाठी आले होते. रामरथोत्सवाच्या निमित्ताने येथे जवळपास 8/10 दिवस मोठी यात्रा भरते. त्यामध्ये मेवा मिठाईची दुकाने, लहान मुलांच्या खेळण्यांची दुकाने, स्त्रियांची विविध आभुषणे, बंागड्यांच्या दुकानांचीही रेलचेल असते. संसारोपयोगी साहित्य, कपडे यांचीही दुकाने असतात. विविध प्रकारची करमणुकीची साधने व खेळ, उंच उंच पाळणे, रेल्वे, फिरती चक्रे आदी मनोरंजनाची व लहान मुलांचे आकर्षण ठरणारी साधनेही या यात्रेत दाखल झाली आहेत. रथोत्सवाच्या पार्श्वभूमीवर चोख पोलीस बंदोबस्त सगळीकडे नेमण्यात आला होताप्रतिवर्षी रथोत्सवानिमित्त नगरपरिषद, नाईक-निंबाळकर देवस्थान ट्रस्टच्यावतीने आयोजित करण्यात येत असलेला कुस्त्यांचा जंगी आखाडा  शुक्रवार दि. २५ रोजी घडसोली मैदान येथे भरविण्यात येणार आहे. दुपारी 2 वाजता या आखाड्याचे उद्घाटन होणार आहे.