जागतिक अस्थिरोग दिनानिमित्त दि. १५ आक्टोंबर २०२३ रोजी फलटण येथे मॅरेथॉनचे आयोजन

फलटण प्रतिनिधी - 

फलटण येथील जोशी हॉस्पिटल प्रा, लि. आणि ट्रामा सेंटर, फलटण च्यावतीने प्रतिवर्षाप्रमाणे जागतिक अस्थिरोग दिनानिमित्त मॅरेथॉनचे आयोजन रविवार दि. 15 आक्टोंबर रोजी सकाळी 6 वजता सजाई गार्डन मंगल कार्यालय, फलटण येथे करण्यात येत असल्याचे निमंत्रक डॉ. प्रसाद जोशी व डॉ. सौ. प्राची जोशी यांनी प्रसिध्दी पत्रकाद्वारे कळविले आहे. 

जागतिक अस्थिरोग दिनानिमित्त जोशी हास्पिटल गेल्या ७ वर्षापासून अनोख्या व आगळ्या वेगळ्या पध्दतीने हा दिन साजरा करत आहे. कोरोना महामारी मुळे मधील दोन वर्षे कुठलेच कार्यक्रम घेता आले नाहीत. त्यामुळे या वर्षी अधिक जोमाने हा कार्यक्रम आपण सर्वांनी मिळून साजरा करूयात असे डॉ प्रसाद जोशी यांनी आवाहन केले आहे.

मानवी जीवन आनंदी व समाधानी असावे त्यासाठी निरोगी मनाची आणि निरोगी मनाच्या वास्तव्यासाठी निरोगी शरीराची आवश्यकता असते. शरीर निरोगी ठेवण्यात आहार व व्यायाम यांचा मुख्य वाटा असून देशाच्या जडणघडणीत युवकांचे योगदान महत्त्वाचे असल्याने युवा पिढीला समजावून घेवून त्यांच्याशी सुसंवाद प्रस्थापित करणे हे सामाजिक कर्तव्य असून जागतिक अस्थिरोग दिनानिमित्त आयोजित मॅरेथॉन कार्यक्रम हा त्यादृष्टीने खारीचा वाटा असल्याचे डॉ. प्रसाद जोशी यांनी स्पष्ट केले. 

२५ ते ७५ वर्षे वयोगटातील सर्वाना व्यायामाचे महत्त्व समजावून देणे व प्रबोधन करण्यासाठी या कार्यक्रमाचे आयोजन करण्यात येते. गेल्या २३ वर्षांपासून फलटण येथे कार्यरत असताना अस्थिरोग उपचार, सांधेरोपण शस्त्रक्रिया आणि मणक्यांवरील शस्त्रक्रिया करून अविरत उपचार देणे चालूच आहे. सदरचे पेशंट आमच्या कुटुंबाचा एक भाग असल्याने सर्वांनी एकत्र येवून दि. १५ आक्टोबर रोजी विविध कार्यक्रमांचे आयोजन करण्यात येत असून या कार्यक्रमास मोठ्या संख्येने उपस्थित राहण्याचे आवाहन डॉ. प्रसाद जोशी यांनी सार्वांना केले आहे.

दि. १५ आक्टोंबर रोजी सकाळी ६ वाजता सजाई गार्डन फलटण येथून १५ कि.मी. मॅरेथॉनची सुरुवात होणार आहे. सकाळी ६.३० वाजता सजाई गार्डन येथून १० कि. मी. मॅरेथॉन स्पर्धेची सुरुवात होणार आहे. सकाळी ७ वाजता ५ कि. मी. मॅरेथॉन ची स्पर्धा सुरू होणार आहे. सकाळी ७.३० वाजता ३ किलोमीटर ची ज्येष्ठांसाठीची वाकेथान सुरू होणार आहे .

सकाळी ८ वाजता रिबोटीक तंत्रज्ञानाची शस्त्रक्रिया केलेल्या पहिल्या ५० रुग्णांची ची अनोखी १.५ किलोमीटरची चालण्याची परेड आपल्याला पाहायला मिळणार आहे .

मॅरेथॉन पूर्ण केल्यावर प्रत्येकाला एक फिनिशर मेडल मिळणार आहे. त्यानंतर भरपेट नाष्ट्याची सोय केली जाणार आहे.

१०.३० वाजता मुख्य कार्यक्रमामध्ये मान्यवरांच्या हस्ते बक्षीस वाटप केले जाईल. सजाई गार्डन कार्यालयामधील कार्यक्रमासाठी प्रवेश पास आवश्यक असल्याचे डॉ. जोशी यांनी सांगितले आहे. 

मॅरेथॉन मध्ये सहभागी होण्यासाठी दि. ३० सप्टेंबर पर्यंत आनलाईन नोंदणी joshihospitalpvtltd.com या वेब साईट वर करता येणार आहे. त्याकरिता प्रवेश शुल्क ५००/- आहे जे की ऑनलाईन जमा करायचे आहेत.

३ किलोमीटर मध्ये भाग घेणाऱ्या ज्येष्ठ नागरिकांना कोणतीही फी आकारली जाणार नसल्याचे निमंत्रक डॉ. प्रसाद जोशी व डॉ. सौ. प्राची जोशी यांनी निदर्शनास आणून दिले आहे.

१२,१३ आणि १४ ऑक्टोबर या तीनही तारखेला सकाळी १० ते दुपारी ५ या वेळेत मॅरेथॉनचे किट सहभागी स्पर्धाकांना मिळणार आहे. तरी जास्तीजास्त संख्येने स्पर्धेत सहभागी व्हावे असे आवाहन जोशी हॉस्पिटल प्रा ली, फलटण तर्फे करण्यात आले आहे .

स्पर्धेतील स्त्री /पुरुष गट पुढील प्रमाणे असणार आहेत, १. १८ ते ३० जोश पूर्ण युवा गट, २. ३१ ते ४५ सळसळती तरुणाई, ३. ४६ ते ६४ प्रगल्भ प्रौढ गट 

४. ६५ आणि त्यापुढील,अनुभवी ज्येष्ठ गट असे एकूण ४ गट करण्यात आले आहेत. पहिले तीन गट हे ५ , १० आणि १५ किलोमीटरच्या मॅरेथॉन मध्ये आपल्या क्षमते नुसार भाग घेऊ शकतात. प्रत्येक गटामध्ये पहिल्या ३( पुरुष व महिला प्रत्येकी ) स्पर्धकांना बक्षिसे दिली जाणार आहेत . पहिले बक्षीस - ₹१००००/-, दुसरे बक्षीस - ₹ ७०००/-, तिसरे बक्षीस- ₹ ५०००/- चौथा गट हा फक्त ३ किलोमीटर चालण्यासाठी आहे या गटाला प्रवेश फी असणार नाही. 

या गटात सुध्दा पहिल्या ३ ( पुरुष आणि महिला प्रत्येकी) स्पर्धकांना वरील प्रमाणे बक्षिसे दिली जाणार आहेत. प्रत्येकाला मॅरेथॉन पूर्ण केल्याचे मेडल व ई सर्टिफिकेट दिले जाणार आहे.