आर्किटेक्ट जितेंद्र भंडारी यांच्यावरील हल्ल्याचा निषेध

कराड : येथील आर्किटेक्ट जितेंद्र भंडारी यांच्यावर झालेल्या हल्ल्याचा दि इंडियन इन्स्टिट्यूट ऑफ आर्किटेक्टच्या कराड उपकेंद्राकडून निषेध व्यक्त करण्यात आला आहे. तसेच या घटनेची गंभीर दखल घेऊन पुन्हा कोणत्याही व्यावसायिकासोबत अशा घटना घडू नयेत, त्यादृष्टीने वातावरण निर्मिती करण्यासाठी पुढाकार घ्यावा, अशी मागणी दि इंडियन इन्स्टिट्यूट ऑफ आर्किटेक्टच्या कराड उपकेंद्राच्या पदाधिकाऱ्यांकडून करण्यात आली आहे.
याबाबतचे निवेदन रविवारी २० रोजी दि इंडियन इन्स्टिट्यूट ऑफ आर्किटेक्टच्या कराड उपकेंद्राच्या वतीने पालकमंत्री बाळासाहेब पाटील, गृहराज्यमंत्री शंभूराज देसाई, खा. श्रीनिवास पाटील आणि आ. पृथ्वीराज चव्हाण यांना देण्यात आले.
यावेळी उपकेंद्राचे अध्यक्ष सारंग बेलापुरे, इन्स्टिट्यूटच्या महाराष्ट्र विभागाचे निमंत्रित कार्यकारणी सभासद आर्किटेक्ट उदयन कुलकर्णी, उपाध्यक्ष आर्किटेक्ट सलीम शेख, सचिव आर्किटेक्ट प्रियदर्शनी देसले, आर्किटेक्ट अमोल शिंदे, द्वारकानाथ मिस्त्री, प्रियांका कणसे आदी. सभासद उपस्थित होते.
या निवेदनात म्हटले आहे की, दि इंडियन इन्स्टिट्यूट ऑफ आर्किटेक्टच्या कराड उपकेंद्राचे खजिनदार आर्किटेक्ट जितेंद्र भंडारी यांच्यावर बुधवारी हल्ला झाला. यामध्ये त्यांना फॅक्चर होऊन ते वैद्यकीय उपचारासाठी रुग्णालयात पाच दिवसांपासून दाखल आहेत. आर्किटेक्ट जितेंद्र भंडारी हे त्यांच्या व्यावसायिक कामाचे शुल्क मागण्यासाठी त्यांच्या क्लायंटकडे गेले असता त्यांच्यावर हा हल्ला झाला असल्याचे समजते.
एक सुसंस्कृत शहर अशी कराडची ओळख असताना व्यवसायिकांबाबत अशी घटना घडणे अस्वाभाविक आणि शहरासाठी नामुष्कीकारक आहे. या घटनेमुळे सर्व व्यावसायिक व आमचे कुटुंबीय यांच्यात चिंतेचे वातावरण निर्माण झाले आहे. कराडमध्ये आम्ही 40 हून अधिक आर्किटेक्ट कार्यरत आहोत. शांतताप्रिय कलासक्त व नेकीने काम करणारा असा हा बहुतांशी वर्ग आहे. दि इंडियन इन्स्टिट्यूट ऑफ आर्किटेक्ट या देशभरातल्या आर्किटेक्टच्या राष्ट्रीय पातळीवरील संस्थेच्या स्थानिक शाखेकडून आम्ही या घटनेचा तीव्र निषेध नोंदवतो.
कराड लोकसभा मतदार संघाचे खा. श्रीनिवास पाटील तसेच पालकमंत्री नामदार बाळासाहेब पाटील, गृहराज्यमंत्री ना. शंभूराज देसाई तसेच माजी मुख्यमंत्री व आ. पृथ्वीराज चव्हाण यांना याबाबत संस्थेने निवेदन सादर करत आहे. त्यांनी सदर घटनेची गंभीर दखल घ्यावी. तसेच अशी घटना पुन्हा कोणाही व्यावसायिकासोबत घडू नये, त्यादृष्टीने वातावरण निर्मिती करण्यासाठी पुढाकार घ्यावा, अशी मागणीही सदर निवेदनाद्वारे करण्यात आली आहे.