फलटणच्या उपनगराध्यक्षपदी प्रियदर्शनी रणजीतसिंह भोसले यांची वर्णी लागण्याची चर्चा

फलटण प्रतिनिधी :

https://dhairyatimess.com/upload/post/7269fce3c6.jpg

नुकत्याच पार पडलेल्या फलटण नगरपालिकेच्या निवडणुकीत भारतीय जनता पक्ष व राष्ट्रवादी काँग्रेस (अजित पवार गट) यांनी जोरदार कामगिरी करत तब्बल ३५ वर्षांनंतर रामराजे गटाच्या सत्तेला हादरा देत सत्ता परिवर्तन घडवून आणले. नगराध्यक्षपदासह १८–९ अशा स्पष्ट बहुमताने भाजप–राष्ट्रवादी आघाडीने फलटण नगरपालिकेवर वर्चस्व प्रस्थापित केले असून शिवसेना पक्षाला पराभव स्वीकारावा लागला.

या पार्श्वभूमीवर गुरुवार, दिनांक २२ जानेवारी २०२६ रोजी फलटण नगरपालिकेमध्ये उपनगराध्यक्ष व स्वीकृत नगरसेवकांची निवड होणार आहे. या निवडीकडे फलटणच्या राजकीय वर्तुळाचे विशेष लक्ष लागून राहिले आहे.

उपनगराध्यक्षपदासाठी माजी नगराध्यक्ष दिलीपसिंह भोसले यांच्या स्नुषा सौ. प्रियदर्शनी रणजीतसिंह भोसले यांच्या नावाची जोरदार चर्चा सुरू असून त्यांना हे पद मिळण्याची दाट शक्यता वर्तवली जात आहे. पक्षांतर्गत सूत्रांकडून मिळालेल्या माहितीनुसार, त्यांचा अनुभव, कौटुंबिक राजकीय पार्श्वभूमी व सत्ताधारी आघाडीतील समन्वय या बाबी त्यांच्या बाजूने जात असल्याचे बोलले जात आहे.

दरम्यान, स्वीकृत नगरसेवकपदासाठी ज्येष्ठ व अनुभवी व्यक्ती म्हणून सुदामराव मांढरे व अशोकराव जाधव यांच्या नावांवर सत्ताधारी आघाडीत एकमत होत असल्याची चर्चा आहे. दोन्ही नेत्यांचा सामाजिक व प्रशासकीय अनुभव लक्षात घेता त्यांना ही संधी दिली जाईल, असा अंदाज व्यक्त केला जात आहे.

दुसरीकडे, शिवसेना पक्षाकडून विधान परिषदेचे माजी सभापती आमदार श्रीमंत रामराजे नाईक निंबाळकर यांचे सुपुत्र व शिवसेनेचे नगराध्यक्षपदाचे उमेदवार श्रीमंत अनिकेतराजे यांना स्वीकृत नगरसेवकपदी संधी मिळण्याची शक्यता वर्तवली जात आहे. 

एकूणच, आज होणाऱ्या या निवडींमुळे फलटण नगरपालिकेतील सत्ताधारी समीकरणे अधिक स्पष्ट होणार असून आगामी काळातील विकासकामे, सत्ताधारी–विरोधी पक्षांचे संबंध आणि राजकीय दिशा याबाबत महत्त्वाचे संकेत मिळणार आहेत. आता सर्वांचे लक्ष नगरपालिकेच्या सभागृहात होणाऱ्या अधिकृत निर्णयाकडे लागले आहे.

https://dhairyatimess.com/upload/post/27fc8a1426.jpg