ठेकेदाराने उभारलेल्या विनापरवाना प्लांटला तडवळे ग्रामपंचायतची नोटीस

फलटण प्रतिनिधी:- तडवळे ता फलटण गावाच्या हद्दीमध्ये नीरा उजवा कालव्याचे अस्तरीकरण करण्यासाठी ठेकेदार कंपनीने आरएमसी प्लांट तडवळे ग्रामपंचायतचा ना हरकत दाखला न घेता उभारल्यामुळे ग्रामपंचायत प्रशासनाने ठेकेदार कंपनीला नोटीस बजावली आहे.
 

फलटण तालुक्यासह संपूर्ण सातारा जिल्ह्यामध्ये नीरा उजवा कालव्याच्या अस्तरीकरणाला हजारो शेतकऱ्यांचा विरोध होत असून फलटण तालुक्यातील कालवा अस्तरीकरणाला सुरवडी, मुरूम, पाडेगाव, मिरेवाडी, कुसुर, रावडी खुर्द, रावडी बुद्रुक, डोंबाळेवाडी, काळज, तडवळे, घाडगेमळा, खराडेवाडी, खामगाव, साखरवाडी, होळ, सुरवडी, वडजल, काशीद वाडी, चौधरवाडी, सासवड, तरडगाव या ग्रामपंचायतींनी ग्रामसभेच्या ठरावामार्फत विरोध केला आहे.

तडवळे ता फलटण गावाच्या हद्दीमध्ये ठेकेदार कंपनीने आरएमसी प्लांट तडवळे ग्रामपंचायतचा ना हरकत दाखला न घेता उभारल्यामुळे ग्रामपंचायत प्रशासनाने ठेकेदार कंपनीला नोटीस बजावली आहे. तडवळे ग्रामपंचायतने कंपनीला बजावलेल्या नोटीसमध्ये म्हटले आहे की, आपला अर्ज ग्रामपंचायत कार्यालयाकडे सादर झालेला आहे परंतु आपणास समक्ष व निरोपाद्वारे ऑफिसला बोलविले असता आपण हजर झाला नाही त्यामुळे अर्ज निकाली काढता आला नाही तसेच ग्रामस्थांनी प्रत्यक्ष पहाणी केली असता त्या ठिकाणी अर्जदार कंपनी वास्तव्यास नसल्याचे आढळून आले त्याऐवजी दुसऱ्या कंपनीचे वास्तव्य आढळून आले त्यामुळे कंपनीचा अर्ज फेटाळण्यात आला आहे. 

हा विषय ग्रामपंचायत तडवळे यांचे मार्फत ग्रामसभेमध्ये मांडण्यात आला असता ग्रामसभे मार्फत ग्रामस्थांनी कंपनीचे वास्तव्य अनधिकृत ठरवले आहे ग्रामपंचायतीची कोणतीही परवानगी घेतलेली नाही. उभा केलेला प्रकल्प व सदर वास्तव्य बेकायदेशीरपणे असल्याने सर्व ग्रामस्थांचा कंपनीस तडवळे ग्रामपंचायत हद्दीमध्ये वास्तव्य करण्यास व नीरा उजवा कालव्याच्या अस्तरीकरणास जाहीर विरोध आहे असे नमूद आहे.