स्वाभिमानी शेतकरी संघटनेचे १५ ऑगस्ट रोजीचे जागरण -गोंधळ आंदोलन तात्पुरते स्थगित 

फलटण प्रतिनीधी - स्वाभिमानी शेतकरी संघटना सातारा जिल्हा व फलटण तालुका तर्फे १५ ऑगस्ट रोजी करण्यात येणारे जागरण -गोंधळ आंदोलन तहसिलदार अभिजित जाधव यांच्याबरोबर झालेल्या चर्चा नंतर झालेल्या कारवाईमुळे आंदोलन तात्पुरते स्थगित केले असल्याची माहिती स्वाभिमानी शेतकरी संघटना सातारा जिल्हाध्यक्ष संग्रामसिंह उर्फ धनंजय संपतराव महामुलकर यांनी दिली आहे.

स्वाभिमानी शेतकरी संघटना सातारा जिल्हा व फलटण तालुका तर्फे विविध मागण्याबाबत महसूल विभागाच्या विविध कार्यालयास स्वाभिमानी शेतकरी संघटना यांनी तक्रार अर्ज दिला होता परंतु त्यावर कोणत्याही प्रकारची कारवाई केली गेली नसल्याने १५ ऑगस्ट रोजी सकाळी तहसील कार्यालय फलटण येथे महसूल विभागाच्या विरोधात संघटना जागरण -गोंधळ आंदोलन करणार होते. आज दिनांक १३ ऑगस्ट रोजी सातारा जिल्हाध्यक्ष धनंजय महामुलकर,फलटण तालुका अध्यक्ष नितीन यादव,जिल्हा सरचिटणीस डॉक्टर रवींद्र घाडगे या स्वाभिमानी शेतकरी संघटनेच्या पदाधिकाऱ्यांशी तहसिलदार अभिजित जाधव यांच्याबरोबर चर्चा झाली असता मागणी मुद्यावर कार्यवाही करण्यात आली.

फलटण तालुक्यातील शेती महामंडळ वर्ग २ जमिनी वर्ग १ करण्यासाठी घेतल्या प्रकरणी महसूल अव्वल कारकून निलेश भोसले, ऋषी भोसले सांगवी कोतवाल व साखरवाडी येथील तलाठी कार्यालयात काम करणाऱ्या खाजगी कर्मचारी शामा भोसले याची व त्याच्या मालमत्तेची लाच लुचपत प्रतिबंधक विभाग यांना महसूल विभागाने चौकशी करणेबाबत आदेश देण्यात यावेत. या प्रकरणी कार्यवाही करण्यासाठी १५ दिवसाची मुदत अभिजीत जाधव तहसिलदार फलटण यांनी मागितली आहे.खाजगी कर्मचारी शामा भोसले यांना यापुढे साखरवाडी तलाठी तसेच मंडल अधिकारी कार्यालयात काम न करण्याच्या सूचना देण्यात आल्या तसेच निलेश भोसले यांची बदली करण्यात आली असून त्यांच्या जागी शेती महामंडळाचे काम विलास पडोळकर यांना देण्यात आले आहे.

तहसील कार्यालय फलटण येथे तहसील कार्यालयातील विविध विभागातील लिपिक व अव्वल लिपिक यांनी निवासी नायब तहसीलदार व नायब तहसीलदार यांना हाताशी धरून महाराष्ट्र शासनाच्या धोरणाच्या व नियमाच्या विरोधात जाऊन अनेक खाजगी कर्मचाऱ्यांची नेमणूक चौकशी व्हावी व संबंधितांवर कारवाई करण्यात यावी. तत्काळ तहसील कार्यालयात काम करणाऱ्या खाजगी कर्मचाऱ्यांना काढण्यात यावे.खाजगी कर्मचारी नेमल्या गेल्या प्रकरणी निलेश भोसले अव्वल लिपिक,प्रशांत शिंदे लिपिक याचा सहभाग असून त्यांना तत्काळ निलंबित करण्यात यावे या प्रकरणी कार्यवाही करण्यासाठी १५ दिवसाची मुदत अभिजीत जाधव तहसिलदार फलटण यांनी मागितली आहे. सर्व खाजगी कर्मचारी यांना यापुढे तहसील कार्यालयात कामवर न येण्याच्या सूचना देण्यात आल्या आहेत. 

फलटण तहसील कार्यालय अंतर्गत येणाऱ्या रींकेश खराडे, तडवळे कोतवाल, ऋषी भोसले सांगवी कोतवाल, विजय दुधेबावी कोतवाल, ढावरे पाडेगाव कोतवाल, गुरव मुंजवडी कोतवाल, गोरे निरगुडी कोतवाल, गोपी जगताप फडतरवाडी कोतवाल, भीमराव चव्हाण राजुरी निवृत्त कोतवाल, सागर काकडे खाजगी कर्मचारी यांची नेमणूक करणाऱ्या अधिकाऱ्यांवर तात्काळ निलंबनाची कारवाई करण्यात यावी. सर्व शासकीय कोतवालांना त्यांच्या नेमणुकीच्या तलाठी कार्यालयात रुजू करण्याचे आदेश व्हावे कोतवाल नेमणूक प्रकरणी तत्काळ चौकशी करण्यात यावी.

या प्रकरणी अभिजीत जाधव तहसिलदार फलटण यांनी १/८/२०२४ रोजी दोन कार्यालयीन आदेश काढून रेकॉर्ड विभागात व तहसील विभागात काम काम करणाऱ्या वरील सर्व कोतवालांना त्यांच्या मूळ पदावर कार्यमुक्त करण्यात आले आहे.

फलटण तालुक्यातील अनेक तलाठी व मंडल अधिकारी कार्यालयात शासकीय कोतवाल असताना अनेक खाजगी कर्मचारी कोतवाल म्हणून काम करणाऱ्या खाजगी कर्मचारी व खाजगी कोतवाल यांच्यावर तत्काळ चौकशी आणि कारवाई करण्यात यावी. या प्रकरणी कार्यवाही करण्यासाठी १५ दिवसाची मुदत अभिजीत जाधव तहसिलदार फलटण यांनी मागितली आहे. सर्व खाजगी कर्मचारी यांना यापुढे तलाठी व मंडल अधिकारी कार्यालयात कामवर न येण्याच्या सूचना देण्यात येणार आहेत. 

फलटण तालुक्यातील तहसील कार्यालयातील रेकॉर्ड विभागातील ऑफलाईन स्वरूपात नक्कल स्वरुपात झालेल्या भ्रष्टाचाराची चौकशी व्हावी. तत्काळ ऑफलाईन नकला देणे बंद करण्यात यावे यापुढे फक्त संगणकृत स्कॅन केलेले नकला द्याव्यात. या प्रकरणी कार्यवाही करण्यासाठी १५ दिवसाची मुदत अभिजीत जाधव तहसिलदार फलटण यांनी मागितली आहे. सर्व मुद्द्यांवर कारवाई सुरू केल्यामुळे १५ ऑगस्ट २०२४ रोजी आम्ही स्वाभिमानी शेतकरी संघटना तर्फे करत असलेले जागरण -गोंधळ आंदोलन तात्पुरते मागे घेत असून वरील प्रलंबीत मागण्यावर १५ दिवसात उचित कारवाई न झाल्यास पुन्हा जागरण -गोंधळ आंदोलन करण्यात येणार आहे अशी माहिती प्रसिध्दी पत्रकान्वये स्वाभिमानी शेतकरी संघटना सातारा जिल्हाध्यक्ष संग्रामसिंह उर्फ धनंजय संपतराव महामुलकर यांनी दिली आहे.