नाकाचे सौंदर्य खुलवण्यासाठी

जाड किंवा बेढब नाक हा अनेक महिलांसाठी अडचणीचा विषय असतो; पण बेढब नाक सुबक दिसू शकेल, असे काही उपाय मेकअपच्या माध्यमातून करता येतात. मेकअपच्या या पद्धतीमुळे तुमचं सौंदर्य अधिक खुलू शकतं.
काही स्त्रियांच्या नाकाचा आकार चेहर्‍याला साजेसा नसतो. काही स्त्रिया तर त्यांच्या नाकाच्या आकारामुळे इतक्या त्रस्त असतात की, त्या सरळ शस्त्रक्रियेचा पर्याय निवडतात, तर काही स्त्रिया त्यांच्या नाकाच्या आकाराबाबत सतत तक्रारी करत असतात. बेढब नाक सुबक दिसावे, यासाठी शस्त्रक्रियेव्यतिरिक्तसुद्धा काही पर्याय आहेत. जाड नाक बारीक दिसावं, यासाठी सर्वांत आधी नोज पिन किंवा नथ बदला. आपल्या नाकावर कुठली नथ चांगली दिसेल, याबाबत एखाद्या ब्युटीशियनचा सल्ला घ्या. आपल्या नाकात जाड नथ चांगली दिसते की बारीक, हे एकदा निश्‍चित झालं, की बेढब नाकाची समस्या थोड्या प्रमाणात कमी होते.
जाड नाक छोटं दिसावं, यासाठी कॉन्टुर मेकअपचा उपयोग होऊ शकतो. कॉन्टुर मेकअप ही एक कला आहे. एखाद्या ब्युटीशियनकडून तुम्ही एकदा कॉन्टुर मेकअप करायला शिकलात, तर घरीसुद्धा तुम्ही हा मेकअप करू शकता. यामध्ये मॅट ब्रॉन्जरचा वापर केला जातो. ब्रॉन्जरमुळे चेहरा कॉन्टुर होतो. तो उजळत नाही. यासाठी तुमच्याकडे ब्रॉन्झ मॅट असायला हवं; पण त्यासोबतच कॉन्टुर करणंही जमायला हवं. नाक छोटं दिसावं, यासाठी केसांच्या स्टाइलबाबतही विचार करू शकता. हेअरस्टाइलच्या काही प्रकारांमुळे नाकाचा आकार लपवता येतो. यामध्ये एका बाजूला केलेले केस चांगले दिसतात. यासाठी उजव्या बाजूला शक्य तितक्या खाली भांग पाडून अधिकाधिक केस एका बाजूला ठेवा.