कोळकीसाठी सुधारित पाणीपुरवठा योजना व सोलर लाईट प्रकल्प - जयकुमार शिंदे

फलटण प्रतिनिधी - 

माजी खासदार रणजितसिंह नाईक निंबाळकर व आ. सचिन पाटील यांच्या माध्यमातून कोळकी गावासाठी पूर्ण क्षमतेची स्वतंत्र पाणीपुरवठा योजना तसेच या योजनेला सोलर सिस्टमचा वीजपुरवठा प्रकल्प राबवण्याचे नियोजन केले असल्याची माहिती भाजपाचे जिल्हा सरचिटणीस जयकुमार शिंदे यांनी दिली.

कोळकी येथील शासकीय विश्रामगृहामध्ये कोळकीच्या विकासाचा रोड मॅप बनवण्यासाठी आयोजित बैठकीत ते बोलत होते. यावेळी स्वराज पतसंस्थेचे चेअरमन अभिजीत ना. निंबाळकर, माजी पं. स. सदस्य सचिन रणवरे, विकास नाळे, उदयसिंह निंबाळकर, संजय देशमुख, जीवन प्राधिकरणचे कुलकर्णी, वीज वितरणचे ग्रामोपाध्ये, ग्रामविकास अधिकारी रमेश साळुंखे, तलाठी क्षीरसागर यांची उपस्थिती होती.

कोळकी ग्रामपंचायतीच्या आठ सदस्यांसह माजी पंचायत समिती सदस्य सचिन रणवरे यांनी माजी खासदार रणजितसिंह ना. निंबाळकर यांच्या नेतृत्वाखाली भाजपमध्ये प्रवेश करताना कोळकी पाणी प्रश्नासह अन्य विकास कामे गतिमान करण्याची मागणी केली होती. गावाचा सर्वांगीण विकास करण्याचे रणजितसिंह निंबाळकर यांनी आश्वासन दिले होते. त्यास अनुसरून विकास कामांचा आराखडा करण्यासाठी तातडीने नियोजन बैठक घेतली. पुढील ३० वर्षांच्या वाढीव लोकसंख्येचा विचार करुन कोळकी गावासाठी तीन एकर जागेत साठवण टॅंक, शुद्ध पाणीपुरवठा योजनेचे नियोजन व्हावे अशी भूमिका अभिजीत ना. निंबाळकर यांनी मांडली. कोळकी बरोबरच गिरवी प्रादेशिक योजनेसाठी सोलर सिस्टिमवर लाईट व्यवस्था केली जावी. त्यामुळे लाईट बिलाअभावी ही योजना बंद पडण्याची भीती राहणार नाही. तसेच वीज बिलाचे पैसे विकास कामासाठी उपयोगी येतील, असे मत जयकुमार शिंदे, महादेवराव गुंजवटे व सदस्यांनी व्यक्त केले.

दरम्यान, गिरवी प्रादेशिक योजनेचे थकीत लाईट बिल शासनामार्फत भरण्याबाबत माजी खासदार रणजितसिंह ना. निंबाळकर व आ. सचिन पाटील सकारात्मक तोडगा काढतील, असेही शिंदे म्हणाले.