माणिकराव सोनवलकर भाजपात; प्रदेशाध्यक्ष बावनकुळेंच्या उपस्थितीत प्रवेश

फलटण प्रतिनीधी - सातारा जिल्हा परिषदेचे माजी अध्यक्ष तथा राष्ट्रवादी काँग्रेस पार्टी राजे गटाचे विश्वासू सहकारी माणिकराव सोनवलकर यांनी भारतीय जनता पार्टीचे प्रदेशाध्यक्ष चंद्रशेखर बावनकुळे यांच्या उपस्थितीमध्ये भारतीय जनता पार्टी जाहीर प्रवेश केला आहे. याबाबतचे विविध फोटो सोशल मीडियावर व्हायरल होत आहे. मुंबई येथे आयोजित कार्यक्रमावेळी खासदार मेधा कुलकर्णी, माजी खासदार रणजितसिंह नाईक निंबाळकर यांची प्रमुख उपस्थिती होती.

रामराजे नाईक निंबाळकर यांनी लोकसभेला माजी खासदार रणजितसिह यांना विरोध करायला नको होता. परंतु स्वतःच्या राजकीय फायद्यासाठी तालुक्यातील जनतेचे फार मोठे नुकसान केले आहे ही खंत तालुक्यातील जनतेला आहे. त्यामुळे या तालुक्याचा आमदार भाजपचा व माजी खासदार रणजितसिह नाईक निंबाळकर यांच्या विचारांचा करण्यासाठीच आम्ही भाजप प्रवेश केला असल्याचे यावेळी माणिकराव सोनवलकर यांनी सांगितले. तर राजे गटाचे अनेक कार्यकर्ते नाराज असून लवकरच त्यांचे प्रवेश भाजपा मध्ये होतील असे यावेळी सोनवलकर यांनी सांगितले. तसेच मा. खासदार रणजितसिह नाईक यांच्या कार्य पध्दतीमुळे आम्ही भारावून गेलो आहे तालुक्यामध्ये रणजीतदादा नी विकासाचा डोंगर उभा केला आहे तसेच सर्वांना बरोबर घेऊन जाणारे नेतृत्व म्हणून रणजितसिंह यांच्याकडे फलटण तालुका पाहातो आहे. यापुढे तालुक्यात भाजपचे विचार तळागाळापर्यंत पोहोचवण्यासाठी काम करणार असल्याचे सोनवलकर यांनी सांगितले.  

 सातारा जिल्हा परिषदेचे माजीअध्यक्ष माणिकराव सोनवलकर हे 1993 पासून राजे गटाचे निष्ठावंत म्हणून कार्यरत होते. पंचायत समिती, जिल्हा परिषद सदस्य, जिल्हा परिषदेचे अध्यक्ष, दुधेबावीचे सरपंच अशी मोठी राजकीय पदे त्यांनी राजे गटाच्या माध्यमातून भूषवली आहेत. धनगर समाजाचे नेते म्हणून त्यांना पाहिले जाते. एकूणच फलटण तालुक्याच्या राजकीय क्षेत्रात माणिकराव सोनवलकर यांचे विशेष प्राबल्य आहे. येणाऱ्या निवडणुकीत याचा मोठा फटका राजे गटाला बसण्याची शक्यता राजकीय जाणकार वर्तवतात. 

यापूर्वी माजी सभापती श्रीमंत शिवरूपराजे खर्डेकर -निंबाळकर, विलासराव नलवडे, माजी नगरसेवक अजय माळवे, सुधीर अहिवळे, यांनी राजे गटाला सोडचिट्टी देत माजी खासदार रणजितसिंह नाईक निंबाळकर यांच्या नेतृत्वावर विश्वास ठेवत भारतीय जनता पार्टीमध्ये प्रवेश केला आहे. 

पक्ष प्रवेश प्रसंगी तालुक्याचे युवा नेते शिवरूपराजे खर्डेकर, संतकृपा उद्योग समुह चे चेअरमन व भाजप नेते विलासराव नलवडे ,पंचायत समिती माजी सदस्य धनंजय साळुंखे पाटील, जिल्हा सरचिटणीस जयकुमार शिंदे, विधानसभा प्रमुख सचिन कांबळे - पाटील, युवा नेते अभिजित नाईक निंबाळकर,, लक्ष्मणराव सोनवलकर, सचिन चांगण , उत्तमराव सोनवलकर, लतीफभाई तांबोळी, मनोज कांबळे पाटील उपस्थित होते.