पुसेसावळी जि. प. गट व म्हासुर्णे गणातील विकासकामे पूर्ण करावीत

 गुडीपाडव्या दिवशी कराड उत्तर मतदार संघातील पुसेसावळी गटात पालकमंत्री यांचा दौरा होता. त्या दौर्‍यामध्ये पुसेसावळी जिल्हा परिषद गटातील व म्हासुर्णे गणातील लाडेगाव ग्रामपंचायत व ग्रामस्थांच्या वतीने पालकमंत्री ना. बाळासाहेब पाटील यांना गावातील विविध विकासकामांमध्ये लाडेगावमधील लक्ष्मी मंदिर संभामंडप, सटवाई मंदिर सभामंडप, लाडेगाव हायस्कूल ते ज.स्वा. वडगाव शिव रस्ता डांबरीकरण, लाडेगाव ग्रामपंचायत हद्दीतील अंगर्गत रस्ते डांबरीकरण आदी कामे पूर्ण करावीत, अशी मागणी पुसेसावळी जिल्हा परिषद गटाचे नेते व माजी जिल्हा परिषद सदस्य जितेंद्र पवार यांच्या मार्गदर्शनाखाली लाडेगाव सरपंच लक्ष्मण यादव, उपसरपंच सागर दीक्षित यांनी ना. बाळासाहेब पाटील यांच्याकडे निवेदनाद्वारे केली आहे.
यावेळी युवा नेते दिलीप यादव, सदस्य शुभम राऊत, अरुण घाडगे, सोसायटी संचालक सत्यवान यादव व पुसेसावळी युवा नेते महेश कदम यांच्यासह ग्रामस्थ उपस्थित होते.
 यावेळी पालकमंत्री यांनी लवकरच सर्व कामे मार्गी लावू, असे आश्‍वासन व शब्द लाडेगाव ग्रामस्थांना दिला. यावेळी पुसेसावळी जिल्हा परिषद गटाचे युवा नेते व लाडेगावचे माजी ग्रामपंचायत सदस्य दिलीप यादव यांनी सहकार व पणन मंत्री तथा पालकमंत्री ना. बाळासाहेब पाटील यांचे लाडेगाव ग्रामंपचायत व ग्रामस्थांच्या वतीने आभार मानले. मुख्यत: महाराष्ट्र सरकारला सत्तेत येऊन सुमारे दीड ते पावणे दोन वर्षे होत आले. सरकार सत्तेत आल्यानंतर काही कालखंडानंतर महाराष्ट्राला संसर्गजन्य कोरोनाचा विळखा पडला. कोरोनामुळे सरकारी तिजोरीवर अधिकसा खर्च आरोग्य विभागावर पडल्यामुळे विकासकामांना निधी अपुरा पडल्याचे दिसून आले. काही दिवसात म्हणजे नोव्हेंबर ते जानेवारीपर्यंत कोरोना रोगाचे प्रमाण थोड्या प्रमाणात आटोक्यात आणण्यास सरकार सफल ठरले, त्यामुळे विविध विकासकामांना गती मिळाली. त्यामुळे रखडलेली कामे पुन्हा मार्गी लागली. त्यातच सातारा जिल्हा पालकमंत्री व सहकार व पणन मंत्री ना. बाळासाहेब पाटील यांच्या कामाचे नियोजन व जिल्ह्यातील कामांना गती देण्यासाठी पुढे सरसावले. व पालकमंत्री यांच्याकडे पुन्हा कामाच्या मागणीचा ओघ वाढू लागला. विविध गावातून कामांच्या मागणीचे पत्र सरपंच व ग्रामपंचायत सदस्य व कार्यकर्ते पालकमंत्री यांच्याकडे करू लागले. 
कराड उत्तर मतदार संघातील पुसेसावळी जिल्हा परिषद गटात काही कालावधीसाठी पालकमंत्री यांच्यापासून दूर गेलेले कार्यकर्ते पुन्हा पक्षात आले. तेव्हापासून पुसेसावळी जिल्हा परिषद गटातील कामांची मागणी पालकमंत्री यांच्याकडे वाढू लागली आहे. नुकत्याच काही ग्रामपंचायतींच्या आता निवडणुका झाल्या. त्यामध्ये बहुतांश ग्रामपंचायती या माजी जिल्हा परिषद सदस्य जितेंद्र पवार व सहकार व पणन मंत्री तथा सातारा जिल्हा पालकमंत्री ना. बाळासाहेब पाटील यांच्या विचाराच्या निवडून आल्या.