फलटण लायन्सच्या माध्यमातून अनेक लोकोपयोगी विकास प्रकल्प : श्रीमंत संजीवराजे

लायन्स क्लब फलटणच्या माध्यमातून फलटण शहर व परिसरात अनेक लोकोपयोगी विकास प्रकल्प उभे राहिले आहेत, विशेषत: लायन्स मुधोजी नेत्र रुग्णालयाच्या माध्यमातून अंधत्व निवारणाचे खूप मोठे काम झाले असून आजपर्यंत सुमारे ३३ हजार मोती बिंदू नेत्र शस्त्रक्रिया, लाखो चष्म्यांचे मोफत वाटप करण्यात आले असल्याचे निदर्शनास आणून देत मालोजीराजे सहकारी बँकेचे चेअरमन श्रीमंत संजीवराजे नाईक निंबाळकर यांनी फलटण लायन्स क्लबच्या सेवा कार्याचे कौतुक करीत शुभेच्छा दिल्या.

येथील महाराजा मंगल कार्यालयात आयोजित फलटण लायन्स क्लब नवनिर्वाचित अध्यक्ष ला. विजयकुमार लोंढे - पाटील, लायन्स क्लब फलटण प्लॅटिनमच्या नवनिर्वाचित अध्यक्षा ला. सौ. सविता दोशी, लिओ क्लब फलटण प्लॅटिनमचे नवनिर्वाचित अध्यक्ष कौशल यादव या नवनिर्वाचित पदाधिकाऱ्यांच्या शपथविधी व पदग्रहण समारंभात विशेष अतिथी म्हणून मार्गदर्शन करताना श्रीमंत संजीवराजे बोलत होते. यावेळी लायन्स मल्टिपल कौन्सिल सेक्रेटरी ला. सुनील सुतार, प्रथम उप प्रांतपाल ला. भोजराज नाईक निंबाळकर, माजी प्रांतपाल प्राचार्य डॉ. राजेंद्र शहा, द्वितीय उप प्रांतपाल ला. एम. के. पाटील, माजी प्रांतपाल ला. पांडुरंग शिंदे, ला. मिलिंद शहा, ला. मामासाहेब जाचक, ला. जगदिश पुरोहित व ला. प्रभाकर आंबेकर, रिजन चेअरमन ला. डॉ. महेश खुस्पे, झोन चेअरमन ला. प्रमोद जगताप, लायन्स मुधोजी नेत्र रुग्णालयाचे अध्यक्ष ला. अर्जुनराव घाडगे, सेक्रेटरी ला. चंद्रकांत कदम, खजिनदार ला. जगदीश करवा, ला. राजीव निंबाळकर, डिस्ट्रिक्ट लायन्स क्वेस्ट चेअरपर्सन ला. सुहास निकम यांच्या सह फलटण लायन्स क्लबचे आजी माजी पदाधिकारी, सभासद आणि फलटणकर उपस्थित होते.

 फलटण लायन्स क्लबने राबविलेल्या अनेक समाजोपयोगी उपक्रमामुळे फलटणकरांना दिलासा मिळालाच त्याशिवाय प्राचार्य ला. डॉ. राजेंद्र शहा यांच्या नंतर ला. भोजराज नाईक निंबाळकर यांच्या माध्यमातून प्रांतपाल पदाची संधी दुसऱ्यांदा प्राप्त होत असल्याचे निदर्शनास आणून देत श्रीमंत संजीवराजे नाईक निंबाळकर यांनी नवनिर्वाचित पदाधिकाऱ्यांचे अभिनंदन करुन पुढील वाटचालीसाठी त्यांना शुभेच्छा दिल्या.

 श्रीमंत संजीवराजे म्हणाले, विशेष करुन लायन्स क्लब फलटण प्लॅटिनमच्या माध्यमातून गेल्या वर्षभरामध्ये खूप मोठे काम झाले, प्रामुख्याने शिक्षकांसाठी घेतलेला टिचर ट्रेनिंग प्रोग्रॅम त्यांनी उत्तमरीत्या राबविला, तसेच सध्या पर्यावरण हा विषय खूप महत्त्वाचा आहे. अवेळी पडणारा पाऊस, वादळ, वारे व सुनामी, ज्वालाग्रहीचा उद्रेक, भूकंपाचे वाढते प्रमाण असे अनेक प्रकार होताना दिसत असल्यामुळे पर्यावरण क्षेत्रामध्ये खूप मोठे काम होणे गरजेचे असल्याचे ओळखून लायन्स क्लब फलटण प्लॅटिनमने वृक्षारोपणाच्या मोहिमा राबवून त्या यशस्वी केल्या असल्याचे श्रीमंत संजीवराजे यांनी निदर्शनास आणून देत सर्वांना धन्यवाद दिले.

 प्रमुख अतिथी ला. सुनील सुतार म्हणाले, गेली २५ वर्षे आपण लायन्स क्लबच्या माध्यमातून काम करीत आहोत, मात्र गेल्या पंचवीस वर्षांमध्ये सर्वात सुंदर काम लायन्स क्लब फलटण प्लॅटिनमच्या माध्यमातून यावर्षी झाले असून त्याचे श्रेय लायन्स क्लब फलटण प्लॅटिनमच्या अध्यक्षा ला. सौ. निलम लोंढे - पाटील, सेक्रेटरी ला. सौ. वैशाली चोरमले, खजिनदार ला. सौ. मंगल घाडगे यांच्या टीमला जाते. त्यांनी गेल्या वर्षामध्ये खूप मोठे सेवाकार्य केले असल्याने लायन्स क्लब फलटण प्लॅटिनमला सर्व पुरस्कार मिळाले असून इंटरनॅशनल स्तरावर याची नोंद झाली आहे.   

नूतन पदाधिकाऱ्यामध्ये लायन्स क्लब फलटणचे अध्यक्ष ला. विजयकुमार लोंढे - पाटील, लायन्स क्लब फलटण प्लॅटिनमच्या अध्यक्षा ला. सौ. सविता दोशी, लिओ क्लब फलटण प्लॅटिनमचे अध्यक्ष लिओ कौशल यादव व त्यांच्या सर्व टीमने याही पेक्षा पुढील वर्षी चांगले काम करुन फलटणच्या नाव लौकिकात भर घालावी अशी अपेक्षा व्यक्त करीत ला. सुनील सुतार यांनी त्यांना त्यासाठी शुभेच्छा दिल्या.

 यावेळी गडहिंग्लज क्लबचे ला. डॉ. किरण खोराटे, ला. डॉ. कल्याणी खोराटे, खेड (कोकण) येथील ला. डॉ. वीरेंद्र चिखले, ला. डॉ. विनया चिखले आणि सातारा रिजन २ मधील सर्व क्लबचे सदस्य, पदाधिकारी उपस्थित होते. 

स्वागत प्रास्तविक ला. मंगेश दोशी, सूत्र संचालन गणेश तांबे सर आणि समारोप व आभार प्रदर्शन माळजाई उद्यान समिती चेअरमन ला. प्रतापसिंह निंबाळकर यांनी केले.