दिलीपसिंह भोसले केवळ सोशल मीडियाचे हिरो? फलटणमध्ये चर्चा रंगल्या

फलटण (प्रतिनिधी) :

फलटण नगरपालिकेचे माजी नगराध्यक्ष दिलीपसिंह भोसले यांनी काही दिवसांपूर्वी भारतीय जनता पक्षात अधिकृत प्रवेश करताच राजकीय वर्तुळात वेगवेगळ्या चर्चा रंगल्या होत्या. 1986 साली नगराध्यक्ष म्हणून उल्लेखनीय कामगिरी करून त्यांनी आपली स्वतंत्र छाप सोडली होती. परंतु गेल्या अनेक वर्षांपासून ते सक्रिय जनसंपर्कापासून दूर असल्यामुळे त्यांच्या पुनरागमनाबाबत मतदारांमध्ये मिश्र प्रतिक्रिया उमटताना दिसत आहेत.

स्थानिक पातळीवर असे बोलले जात आहे की, दीर्घकाळ जनतेत न राहिल्याने त्यांच्या उमेदवारीला अपेक्षित असा जनाधार मिळत नसल्याचे चित्र आहे. सोशल मीडियावर मात्र त्यांच्या पोस्ट, फोटो आणि राजकीय विधानांचा जोर दिसून येतो. त्यामुळे “दिलीपसिंह भोसले हे केवळ सोशल मीडियाचे हिरो ठरत आहेत” अशी उपहासत्मक चर्चा फलटणमध्ये रंगत आहे.

 लक्झरी कार आणि काळ्या काचा -

 दिलीपसिंह भोसले यांची विशेष ओळख म्हणजे लक्झरी गाडीच्या काळ्या काचा बंद करुन शहरातून प्रवास अशी आहे. त्यामुळे शहरातील अडचणी त्यांना दिसणार का अशा प्रश्न शहरातील नागरिक विचारू लागले आहेत. 

भाजपामध्ये प्रवेश करून पक्षाला भोसले यांच्या अनुभवी नेतृत्वाची गरज असली तरी जनतेतील चर्चा हा त्यांच्यासमोरील सर्वात मोठा आव्हानात्मक मुद्दा ठरणार आहे. आगामी निवडणुकीच्या पार्श्वभूमीवर भोसले प्रत्यक्ष जनतेत कितपत प्रभाव निर्माण करतात, याकडे सर्वांचे लक्ष लागले आहे.