गत वेळेपेक्षा जास्त मताने जनता निवडून देईल - जे. पी.नड्डा यांचा खा. रणजितसिंह यांच्या विषयी विश्वास

फलटण प्रतिनिधी -

दिल्ली येथील भारतीय जनता पक्षाच्या कार्यालयामध्ये माढा लोकसभा मतदार संघाचे खासदार रणजीतसिंह नाईक निंबाळकर यांनी राष्ट्रीय अध्यक्ष जे. पी. नड्डा यांची भेट घेतली व मतदारसंघांमध्ये केलेल्या विकास कामाची संपूर्ण माहिती त्यांना दिली. यावेळी जेपी नड्डा खासदार रणजितसिंह यांच्या विषयी म्हणाले, तुम्ही केलेल्या विकास कामावर, सर्व लोकप्रतिनिधी, भारतीय जनता पक्ष व महायुतीतील घटक पक्ष, कार्यकर्ते त्याचबरोबर जनता खुश आहे त्यामुळे येणाऱ्या लोकसभा निवडणुकीत गत वेळेपेक्षा जास्त मताने जनता निवडून आपणास निवडून देईल असा विश्वास जे. पी.नड्डा यांनी व्यक्त केला. तर यापुढेही खासदार रणजितसिंह नाईक निंबाळकर यांनी चांगले काम करावे असा सल्ला ही दिला.

यावेळी खासदार रणजीतसिंह नाईक निंबाळकर यांनी मतदार संघातील कामाबाबत जे. पी. नड्डा यांना माहिती दिली. तसचे माढा लोकसभा मतदारसंघ हा दुष्काळी मतदारसंघ म्हणून ओळखला जात होता मात्र भारताचे पंतप्रधान नरेंद्र मोदी व महाराष्ट्राचे उपमुख्यमंत्री देवेंद्रजी फडणवीस यांच्या मार्गदर्शनाखाली केंद्र व राज्य शासनाच्या माध्यमातून या मतदारसंघांमध्ये कोणतीही पाण्याची योजना शिल्लक ठेवली नसल्याचे सांगत रस्ते, इन्फ्रास्ट्रक्चर, एम.आय.डी.सी. ही कामे मार्गे लावण्यामध्ये आपण यशस्वी झालो असल्याचे सांगितले. तसेच संघटनेतील सर्व पदाधिकाऱ्यांना सन्मानाची वागणूक देऊन त्यांच्याही प्रश्नाची सोडवणूक करण्यामध्ये कमी पडलो नाही. यापुढेही पक्ष संघटना व जनतेसाठी सातत्याने संपर्क ठेवून मतदार संघाचा विकास घडवण्याचा प्रयत्न करणार असल्याचे यावेळी खासदार रणजितसिंह यांनी आश्वासन दिले. यावेळी जे. पी. नड्डा यांनी खासदार रणजितसिंह नाईक निंबाळकर यांना आगामी लोकसभा निवडणुकीच्या दृष्टीने शुभेच्छा व्यक्त केल्या.