थोरला तुतारीत तर धाकला कमळात : फलटणकरांचे मनोरंजन

सचिन मोरे, फलटण. 

लोकसभा निवडणुकीच्या अनुषंगाने महाराष्ट्रासह देशभर मोठी धामधूम सुरु आहे. विविध पक्षातील मोठे राजकीय नेते, कार्यकर्ते एका पक्षातून दुसऱ्या पक्षात दाखल होताना दिसत आहेत तर त्याचीच "री" ओढताना अनेक गावांमध्ये कार्यकर्त्यांनाही पक्ष बदलाचे वारे लागल्याचे दिसत आहेत. फलटणमध्ये मात्र मतदारांची मनोरंजन करणारी घटना घडत आहे, आणि लोकांना " गोलमाल " करण्याचे काम फलटण मधील एका बड्या नेत्याची दोन्ही मुले करताना दिसत आहेत. दोघे भाऊ वेगवेगळ्या पक्षात जनतेला दाखवून आपला राजकीय व वैयक्तिक स्वार्थ साधत असल्याने सर्वसामान्य लोकांना सण 1979 सालच्या "गोलमाल" या हिंदी चित्रपटातील सुप्रसिद्ध गीतकार गुलजार यांचे लोकप्रिय गीत "गोलमाल है भाई सब गोलमाल है...." हे आठवल्याशिवाय राहत नाही. 

फलटणमधील "राजकीय व्यावसायिक" नेता अशी ज्यांनी ओळख त्यांचे दोघे सुपुत्र सध्या प्रचारात व्यस्त आहेत. फरक एवढाच आहे की, थोरला भाऊ तुतारीचा अर्थात महाविकास आघाडीचा प्रचार करतोय तर तर धाकला भाऊ कमळाचा म्हणजे महायुतीच्या उमेदवाराला विजयी करण्यासाठी फलटणकरांना साद घालतोय, या दोघांमुळे मात्र फलटणकरांचे चांगलेच मनोरंजन होताना दिसत आहे. तर या "राजकीय व्यावसायिक" नेत्यांच्या मुलांना फलटणकर मात्र फारसे गांभीर्याने घेताना दिसत नाहीत. "दोघे भाऊ वेगवेगळ्या पक्षात जनतेला दाखवू आणि आपला स्वार्थ साधू" असे एका मतदाराने या दोघांविषयी म्हटले आहे. 

मायबाप जनतेला काहीच समजत नाही असे या दोन भावांचा समज असल्याने राजकीय त्याचबरोबर वैयक्तिक स्वार्थ साधण्यासाठी हे दोघे भाऊ सर्वसामान्य जनतेला मूर्ख बनवून आपली पोळी भाजत आहेत. दोघांच्यातील एकाने म्हणायचे तो आमचं ऐकत नाही, तर दुसऱ्याने म्हणायचे ते आमचे ऐकत नाहीत. आणि "तू तू मैं मैं" मध्ये स्वतःचा व्यावसायिक स्वार्थ साधवून घ्यायचा नवा फंडा या दोन भावांनी फलटण तालुक्यात आणला आहे. 

अनेक घरा - घरात कोणाला मतदान करायचे या वरून वाद होताना दिसत आहेत,  त्यात या भावांनी नवा राजकीय पायंडा पाडल्याने कोणताही राजकीय पक्षाचा नेता आता कोणत्याही कार्यकर्त्याला त्याच्या संपूर्ण कुटुंबाला संपूर्ण मतदान एकाच पक्षाला करा हे बोलू शकत नाही हे मात्र नक्की. सद्गुरूंचा आशिर्वाद लाभल्याचे नाटक करणाऱ्या या संधीसाधू भावांसह या कुटुंबाला फलटणकर जनतेने चांगलेच ओळखलं आहे. त्यामुळे भविष्यातील राजकारणात यांना फलटणकर धडा शिकवणार असे फलटण शहरांत चर्चा सुरु आहे.