राजेंची दुसऱ्या दिवशीही आयकर विभागाकडून मॅरेथॉन चौकशी

फलटण प्रतिनिधी :- 

विधानपरिषदेचे माजी सभापती रामराजे नाईक निंबाळकर यांचे बंधू संजीवराजे नाईक निंबाळकर आणि रघुनाथराजे नाईक निंबाळकर यांच्या घरी 5 फेब्रुवारी सकाळी 6 वाजता आयकर विभागाने छापा टाकल्याची माहिती समोर आली होती. त्यानंतर राज्याच्या राजकारणामध्ये मोठी खळबळ उडाली होती. काल आयकर विभागाकडून संजीवराजे नाईक निंबाळकर यांची तब्बल 17 तास चौकशी केली. आयकर विभागाचे अधिकारी रात्री उशिरा संजीवराजे यांच्या फलटण येथील बंगल्यातून बाहेर पडले. आज दुसऱ्या दिवशीही फलटण येथे सकाळी 6 वाजल्यापासून आयकर विभागाची मॅरेथॉन चौकशी सायंकाळी उशिरा पर्यत सुरु होती.त्यानंतर दुसऱ्या दिवशी दुपारी संजीवराजे घराबाहेर आले होते, त्यांनी कार्यकर्त्यांना शांत राहण्याचं आवाहन केले होते.

याचदरम्यान त्यांच्यावर आयकर विभाग मोठी कारवाई करत असल्याचं समोर आलंय. त्यांच्या फलटणसह पुण्यातील घरीही सलग दुसऱ्या दिवशी इन्कम टॅक्स विभागाच्या अधिकाऱ्यांकडून तपासणी सुरू आहे. त्यामुळं राजकीय वर्तुळात मोठी खळबळ उडाली आहे.

इन्कम टॅक्स विभागाने काल 5 फेब्रुवारी रोजी संजीवराजे नाईक निंबाळकर व रघुनाथराजे नाईक निंबाळकर यांच्या घरावर छापे टाकले होते. संजीवराजे नाईक निंबाळकर यांच्या फलटणसह मुंबई आणि पुण्यातील घरावर ही छापेमारीची कारवाई करण्यात आली होती. दरम्यान आज सलग दुसऱ्या दिवशी देखील तपासणी सुरूच आहे.संजीवराजे नाईक निंबाळकर यांच्या बंगल्यावर गोविंद दूध डेअरीबाबत चौकशी सुरु आहे. एकाचवेळी फलटण व पुणे येथील निवासस्थानी ही छापेमारी करण्यात आली आहे. विविध ठिकाणचे आर्थिक व्यवहारांबाबत अधिकारी चौकशी करत आहेत.

संजीवराजे नाईक निंबाळकर हे सातारा जिल्ह्याताील फलटणमधील ते एक वजनदार नेते आहेत. तर संजीवराजे आणि रघुनाथराजे हे माजी सभापती रामराजे नाईक यांचे चुलत बंधू आहेत.सध्या संजीवराजे व रघुनाथराजे शरद पवारांच्या पक्षात आहेत.श्रीमंत संजीवराजे नाईक निंबाळकर यांच्या निवासस्थानी केंद्रीय तपास यंत्रणा दाखल झाल्यापासून सोशल मीडियावर विविध प्रतिक्रिया उमटत आहेत. राजे गट व त्यांच्या विरोधी गटाचे कार्यकर्ते सुद्धा सोशल मीडियावर आक्रमक झाले आहेत.

 दरम्यान आज दुसऱ्या दिवशीही संजीवराजे नाईक निंबाळकर यांच्या फलटण येथील बंगल्यासमोर त्यांच्या कार्यकर्त्यांनी मोठी गर्दी केली होती. त्यामध्ये माजी आमदार दिपकराव चव्हाण, माजी सभापती शंकरराव माडकर, सौ. रेश्माताई भोसले, बापूराव गावडे, दत्ता अनपट यांच्यासह विविध मान्यवर दिवसभर ठाण मांडून होते.

 सर्व काही सुरळीत काळजी करू नका - संजीवराजे 

दरम्यान आज दुपारी चौकशी दरम्यान सत्यजितराजे यांच्या सोबत संजीवराजे यांनी बंगल्या बाहेर येत उपस्थित कार्यकर्त्यांना सर्व काही सुरळीत असल्याचे सांगितले. सर्वांनी जेवण करून घ्या काळजी करू नका असे कार्यकर्त्यांना संजीवराजे म्हणाले.यावेळी त्यांचे चिरंजीव सत्यजितराजे नाईक निंबाळकर हेही त्यांच्या सोबत होते.

 याच्यातून काही निष्पन्न होणार नाही - रघुनाथराजे 

 काही चौकशी केली तरी याच्यातून काही निष्पन्न होणार नाही असा विश्वास माध्यमांशी बोलताना रघुनाथराजे नाईक निंबाळकर यांनी व्यक्त केला. हा प्रोसेसचा भाग आहे, साप साप म्हणून भुई धोपटत होते ते तरी बंद झालं असा टोला रघुनाथराजे यांनी विरोधकांना लगावला. सर्व रेकॉर्ड चेक करत आहेत ती लोकही हेल्पफूल आहेत आणि संजीवराजेंकडे प्रत्येक गोष्टीचे उत्तर आहे असेही रघुनाथराजे म्हणाले. फलटण म्हणजे बिहार नाही त्यांना वाटलं होतं की या ठिकाणी पैशाचे ढीग सापडतील परंतु प्रत्येक रुपयाचा हिशोब आहे असे शेवटी रघुनाथराजे म्हणाले.