आयटीआय च्या समस्या मार्गी लावणार : खा. उदयनराजे भोसले

सातारा : साताऱ्यातील औद्योगिक प्रशिक्षण संस्था एक नावाजलेली, जुनी आणि आदर्श शासकीय संस्था आहे. याठिकाणाहुन विविध कोर्सेस पूर्ण करुन, अनेकांना समृध्द जीवनाचा मार्ग लाभलेला आहे. जशी मुंबई कोणाला उपाशी राहु देत नाही अशी ख्यातकिर्ती आहे, तसे औद्योगिक तंत्र शिक्षण कोणाला उपाशी राहु देत नाही. आयटीआयच्या कोर्सेसना मोठे महत्व आहे. काळानुरुन येथे नवीन प्रशिक्षण वर्ग देखिल चालवले जात आहेत. सातारच्या आयटीआयच्या क्रीडांगणाचा योग्य विकास, आयटीआय प्रमाणपत्र पात्र विद्यार्थ्यांना रोजगाराची संधी, विद्यार्थी व प्रशासनाच्या विविध समस्या, इत्यादी बाबत दीपावलीनंतर तंत्र शिक्षण विभाग, सार्वजनिक बांधकाम विभाग, इ. विभागांची संयुक्‍त बैठक घेवून या समस्या मार्गी लावल्या जातील, असे आश्‍वासन खासदार श्रीमंत छत्रपती उदयनराजे भोसले यांनी दिले.
खासदार श्रीमंत छत्रपती उदयनराजे भोसले यांनी सातारा येथील औद्योगिक प्रशिक्षण संस्थेला सदिच्दा भेट दिली. त्यावेळी ते बोलत होते. प्राचार्य एस्‌.एम्‌.धुमाळ, उपप्राचार्य एस.एम.मांगलेकर, सहा.अँप्रॅन्टीस अँडव्हाझर एम.के.उपाध्ये, अँड.डि.जी.बनकर, प्रमुख उपस्थित होते.
सातारची इन्डस्ट्रीयल ट्रेनिंग इंन्स्टीटयुट मोळाचा ओढा परिसरात विस्तीर्ण जागेमध्ये गेल्या कित्येक वर्षापासून कार्यरत आहे, असे नमुद करुन खासदार श्रीमंत छत्रपती उदयनराजे भोसले यांनी पुढे सांगीतले की, याठिकाणी डिझेल मेकॅनिक, मोटार मेकॅनिक, इलेक्ट्रीशयन, हार्डवेअर-सॉफटवेअर प्रोग्रामिंग, प्लंबर, जोडारी, वायरमन, मशिनिस्ट, इत्यादी महत्वपूर्ण कोर्सेस अनेक वर्षापासून चालत आहेत. कालानुरुप कोर्सेसमध्ये देखिल योग्य ते बदल करण्यात आलेले आहेत. त्यामुळे आयटीआय प्रमाणपत्र धारकांस रोजगाराच्या निश्‍चित अशी संधी उपलब्ध आहे. काही वेळा टायमिंग जुळत नाही म्हणून काहींना लवकर संधी मिळत नाही. यापुढे अश्या प्रशिक्षणाथींना रोजगाराची संधी वेळेत मिळण्यासाठी आम्ही प्रयत्न करणार आहोत. संबंधीत कंपन्यांचे कॅम्पस्‌ आयोजित करुन, रोजगाराची अधिकाधिक संधी निर्माण करण्याचा आमचा प्रयत्न आहे.
आयटीआय विद्यार्थी आणि प्रशासनाच्या काही समस्या आहेत, येथील क्रीडा मैदानास योग्य सुविधा उपलब्ध करुन दिल्यास, प्रशिक्षणाथींना त्याचा निश्‍चितच लाभ होणार आहे. स्टॅन्ड ते आयटीआय अशी बस सेवा सध्या उपलब्ध नसल्याचे काही महिला प्रशिक्षणांथींनी सांगीतले आहे. या अश्या अनेक समस्यांबाबत संबंधीतांना सूचना दिल्या जातील, आवश्यकते प्रमाणे संयुक्त बैठक दीपावलीनंतर घेतली जाईल आणि आयटीआयच्या उर्जितावस्थेकरीता सर्व ते प्रयत्न केले जातील. संस्थेच्या पायाभुत सुविधा अधिकाधिक विकसित झाल्या तर अश्या संस्थेतील प्रशिक्षणार्थींची चौफेर प्रगती साध्य होण्यास सुलभ होत असते याच हेतुने याकामी जरुर त्या उपाययोजना करण्यात येतील, असे ही खा. श्रीमंत छत्रपती उदयनराजे भोसले यांनी यावेळी सांगितले.
प्रारंभी, आयटीआयचे प्राचार्य एस्‌.एम्‌.धुमाळ यांनी खासदार श्रीमंत छत्रपती उदयनराजे भोसले यांचे प्रशिक्षणाथीं आणि प्रशासनाच्या वतीने स्वागत केले.
शिंदे यांनी प्रास्ताविक व आभार व्यक्‍त केले, यावेळी सुतार यांनी स्वतः व प्रशिक्षणार्थी यांनी मिळुन तयार केलेला स्कील इंडियाचा लोगो खासदार श्रीमंत छत्रपती उदयनराजे भोसले यांना प्रदान केला. खासदार श्रीमंत छत्रपती उदयनराजे भोसले यांनी प्रशिक्षणाथींनी मनमोकळा संवाद साधुन, हितगुज केले.
यावेळी संस्थेतील निकम, गोसावी, महानावर, श्रीमती जोगाईकर, बोराटे इ. गटनिर्देशक व कर्मचारी आणि बहुसंख्य प्रशिक्षणार्थी उपस्थित होते. दरम्यान, सातारच्या आयटीआयला खा. श्रीमंत छत्रपती उदयनराजे भोसले यांनी सदिच्छा भेट दिल्याने, संस्थेचा सेवकवर्ग आणि प्रशिक्षणार्थी विद्यार्थ्यांमध्ये सकारात्मक उत्साह निर्माण झाल्याचे दिसून येत होते.