फलटणच्या भूमापियांनी शेतातील नाला केला गायब : भूमापियांवर तातडीने कारवाई करण्याची शेतकऱ्यांची मागणी

फलटण तालुक्यात अनेक ठिकाणी महसूल विभागाच्या मदतीने बेकायदेशररित्या प्रादेशिक नियोजन आराखड्याचे उल्लंघन करत शेत जमिनीत शेती प्लॉट करून विक्री करण्याचा सपाटा 

फलटण प्रतिनीधी:- फरांदवाडी येथील फलटण सातारा रोड परिसराच्या लगत असणाऱ्या ओढयास जाणाऱ्या नाल्यात भराव टाकून नैसर्गिक नाला बंद केल्याने शेतकरी आक्रमक झाले आहेत हा नाला भूमाफियांनी बुजवल्याचा आरोप त्यांनी केला आहे. यामुळे परिसरातील शेतात पाणी शिरू शकते याला कारणीभूत भूमाफिया यांच्यावर तातडीने कारवाई करावी, अशी मागणी शेतकऱ्यांनी केली आहे.

फरांदवाडी येथील गट क्रमांक 39 मध्ये एक ओढ्यास मिळणाऱ्या नाला गेला होता. तो नाला काही भू माफिया यांनी महसूल विभागाच्या मुक संमतीने पूर्णपणे बुजवून त्या ठिकाणी शेती गुंठेवारी प्लॉट तयार केले आहेत. बाणगंगा नदीकडे जाणारा मुख्य नैसर्गिक नाला भराव टाकून बुजवण्यात आला आहे. याबाबतचा नकाशे शेतकऱ्यांनी उपलब्ध केले असून नकाशात स्पष्टपणे नाला दिसत असताना तसेच प्रत्यक्षात नाला असताना कोणत्याही प्रकारची महसूल विभागाची संमती न घेता या ठिकाणी माती टाकून त्यावर मातीने नाला बुजवला आहे. 

यामुळे ओढ्याच्या दिशेने जाणारे पाणी वाहून जाण्यास अडथळा निर्माण होणार आहे. पावसाळ्यात यामुळे नागरिकांना अडचणींचा सामना करावा लागू शकतो. अनधिकृत शेती प्लॉट तयार करून नाला बुजवून रस्ता करण्यात आला आहे. पाण्याचा निचरा होण्यासाठी जागा नसल्याने येत्या पावसाळ्यात नक्कीच येथील प्रत्येक शेतात पाणी शिरून नागरिकांना अनेक अडचणींचा सामना करावा लागू शकतो. पावसाच्या पाण्याचा निचरा होण्यासाठी नैसर्गिक नाले बुजवले जाऊ नयेत तसेच नाल्यांचे रुंदीकरण व्हावे. जे नाले बुजवून अशा पद्धतीने नैसर्गिक पाण्याच्या प्रवाहाला अडथळा निर्माण करत आहेत, त्यांच्यावर कडक कारवाई करावी व नाला पुन्हा खुला करावा, अशी मागणी शेतकऱ्यांनी केली असून या प्रकरणी उपविभागीय अधिकारी सचिन ढोले व तहसिलदार अभिजित जाधव काय कारवाई करणार याकडे सर्वांचे लक्ष लागले आहे.

मी कामानिमित्त बाहेरगावी असल्याने प्रतिक्रिया देवू शकत नाही.

नामदेव नाळे,मंडलाधिकारी

 

मी पाहिलं नाही आज बघून घेतो, लेवल केल्यानंतर मी बघितलं नाही

रावसाहेब काळे, तलाठी, फरांदवाडी