राष्ट्रवादी सहकार पॅनेलच्या ११ जागा बिनविरोध

सातारा : जिल्हा मध्यवर्ती बँकेच्या निवडणुकीमध्ये राष्ट्रवादी काँग्रेसच्या सहकार पॅनेलने 21 पैकी 11 जागा बिनविरोध जिंकून पुन्हा एकदा आपले वर्चस्व सिद्ध केले. सहा सोसायटी मतदारसंघांसह एकूण 10 जागांसाठी वीस उमेदवार रिंगणात असून त्यासाठी राजकीय रणनीती गतिमान होणार आहे. मात्र भाजपचे खासदार रणजितसिंह नाईक निंबाळकर व आमदार जयकुमार गोरे यांनी निवडणुकीतून आपले अर्ज माघारी घेतल्याने आश्चर्य व्यक्त होत आहे.
रामराजे यांची शिष्टाई आणि आमदार शिवेंद्रसिंहराजे यांच्या मंजूरीनंतर सहकार पॅनलने अर्ज माघारीच्या निर्णायक क्षणी खासदार उदयनराजे भोसले यांनाच उमेदवारी देऊन त्यांच्याविरोधातील सर्वच उमेदवारी अर्ज काढून घेतल्याने उदयनराजे बिनविरोध निवडून गेले. सत्ताधाऱ्यांविरोधात खासदार रणजितसिंह नाईक निंबाळकर व आमदार जयकुमार गोरे हे दंड थोपटून उभे राहिले होते. उमेदवारी अर्ज मागे घेण्याची प्रक्रिया संपल्यानंतर त्यांचे पॅनल जाहीर होणार होते. मात्र, ऐनवेळी त्यांनीच स्वत:सह समर्थकांचे उमेदवारी अर्ज काढून घेतल्याने त्यांचा विरोध मावळल्याचे स्पष्ट झाले. मात्र स्वतंत्र पॅनेलची तयारी करणाऱ्या भाजप नेत्यांनी ऐन लढाईत शस्त्रे का म्यान केली, हे गुलदस्त्यातच राहिले.
आता सातारा, फलटण, खंडाळा, वाई, महाबळेश्वर हे विकास सोसायटी मतदारसंघ तसेच खरेदी विक्री संघ, कृषी प्रक्रिया, गृहनिर्माण, भटक्या जमाती, अनुसूचित जाती, औद्योगिक विणकर हे ११ मतदारसंघ बिनविरोध करुन सत्ताधारी सहकार पॅनलने बाजी मारली आहे. आता माण, कोरेगाव, जावली, खटाव, पाटण, कराड, महिला प्रवर्ग २ जागा, इतर मागास प्रवर्ग, नागरी बँका पतसंस्था या मतदारसंघांतील 10 जागांसाठी निवडणूक लागलेली आहे. या एकूण दहा जागांसाठी आता वीस उमेदवार रिंगणात असल्याचे सहाय्यक निवडणूक निर्णय अधिकारी शंकर पाटील यांनी सांगितले .
विशेषत: सोसायटी मतदारसंघांमध्ये घमासान लढती पहायला मिळणार आहेत. कराड सोसायटी मतदारसंघामधून सहकार मंत्री बाळासाहेब पाटील विरुध्द ॲड. उदयसिंह पाटील उंडाळकर, खटावमधून नंदकुमार मोरे विरुध्द माजी आमदार प्रभाकर घार्गे, माणमध्ये मनोज पोळ विरुध्द शेखर गोरे, पाटणमध्ये गृहराज्यमंत्री शंभूराज देसाई विरुध्द सत्यजित पाटणकर, कोरेगावमध्ये शिवाजीराव महाडीक विरुध्द सुनील खत्री, जावलीत आमदार शशिकांत शिंदे विरुध्द ज्ञानदेव रांजणे या लढती लक्षवेधी ठरणार आहेत.

हे आहेत बिनविरोध संचालक...
खरेदी विक्री - आमदार मकरंद पाटील
कृषी प्रक्रिया - शिवरूपराजे खर्डेकर
गृहनिर्माण - खासदार उदयनराजे भोसले
भटक्या विमुक्त जमाती - लहू जाधव
अनुसूचित जाती जमाती - सुरेश सावंत
औद्योगिक व विणकर - अनिल देसाई
प्राथमिक कृषी पतपुरवठा गट मतदारसंघ
सातारा - आमदार शिवेंद्रराजे भोसले
फलटण - रामराजे नाईक-निंबाळकर
खंडाळा - दत्तानाना ढमाळ
वाई - नितीन पाटील
महाबळेश्वर - राजेंद्र राजपुरे