सोनिया चॅरिटेबल ट्रस्टतर्फे दहावी-बारावी गुणवंतांचा गौरव; विद्यार्थ्यांना शैक्षणिक साहित्याचे वाटप

फलटण प्रतिनिधी : 

सोनिया चॅरिटेबल ट्रस्ट, फलटण यांच्या वतीने मंगळवार पेठेतील बुद्ध बंगला येथे दहावी व बारावी परीक्षेत यश संपादन केलेल्या गुणवंत विद्यार्थ्यांचा सत्कार व गुणगौरव सोहळा उत्साहपूर्ण वातावरणात पार पडला. कार्यक्रमास आमदार सचिन कांबळे पाटील, नगराध्यक्ष समशेर सिंह नाईक-निंबाळकर यांच्यासह विविध क्षेत्रातील मान्यवरांची उपस्थिती लाभली.

माजी नगरसेवक सनी अहिवळे व नगरसेविका सुपर्णा सनी अहिवळे हे गेल्या २२ वर्षांपासून सामाजिक बांधिलकी जपत हजारो गरीब, होतकरू व गुणवंत विद्यार्थ्यांचा सत्कार करून त्यांना शालेय साहित्य, दप्तर, वह्या व पुस्तके देत प्रोत्साहन देत आहेत. याच परंपरेचा भाग म्हणून यंदाही गुणवंत विद्यार्थ्यांचा गौरव करण्यात आला.

कार्यक्रमाची सुरुवात महामानवांच्या प्रतिमांचे पूजन व दीपप्रज्वलनाने झाली. त्यानंतर विद्यार्थ्यांना गौरवपत्र, दप्तर व शालेय साहित्य देऊन सन्मानित करण्यात आले. तसेच ‘झाडे लावा, झाडे जगवा’ या उपक्रमांतर्गत उपस्थित मान्यवरांना रोपटे देऊन सन्मान करण्यात आला.

यावेळी बोलताना आमदार सचिन कांबळे पाटील यांनी सनी अहिवळे व सुपर्णा अहिवळे यांच्या शिक्षण क्षेत्रातील कार्याचे कौतुक केले. गरजू विद्यार्थ्यांना आधार देण्याचे त्यांचे कार्य प्रेरणादायी असल्याचे सांगत त्यांनी डॉ. बाबासाहेब आंबेडकर फलटण नगर परिषद शाळा क्रमांक २ साठी निधीची कमतरता भासू देणार नसल्याचे आश्वासन दिले. तसेच फलटणमधील मराठी शाळांचा शैक्षणिक दर्जा उंचावण्यासाठी प्रयत्नशील राहणार असल्याचेही त्यांनी स्पष्ट केले.

नगराध्यक्ष समशेर सिंह नाईक-निंबाळकर यांनी सोनिया चॅरिटेबल ट्रस्टच्या कार्याचे कौतुक करत शिक्षणातूनच समाज परिवर्तन घडते, असे मत व्यक्त केले. फलटण नगर परिषद शाळांमध्ये आधुनिक तंत्रज्ञानाचा वापर वाढावा यासाठी संगणक सुविधा उपलब्ध करून देण्याचा प्रयत्न केला जाईल, असे त्यांनी सांगितले.

माजी नगरसेवक सनी अहिवळे यांनी, “बुद्ध निवासच्या दारात आलेल्या कोणत्याही विद्यार्थ्याला आम्ही रिकाम्या हाताने पाठवले नाही. भविष्यातही ‘मिशन 100 डॉक्टर-इंजिनिअर’ सारखे उपक्रम राबवून ग्रामीण भागातील विद्यार्थ्यांना मुख्य प्रवाहात आणण्याचा प्रयत्न करू,” असे सांगितले.

उपनगराध्यक्षा सौ. प्रियदर्शनी रणजीत भोसले, विजय येवले, नगरसेवक सचिन अहिवळे, नगरसेविका मीना जीवन काकडे, नगरसेवक सुदाम मांढरे, नगरसेविका सिधाली अनुप शहा, बी. टी. जगताप यांच्यासह सामाजिक, शैक्षणिक व राजकीय क्षेत्रातील अनेक मान्यवर मोठ्या संख्येने उपस्थित होते.

कार्यक्रमाचे सूत्रसंचालन हरीश काकडे यांनी केले, तर नगरसेविका सुपर्णा सनी अहिवळे यांनी उपस्थितांचे आभार मानले. कार्यक्रमास विद्यार्थी, पालक व नागरिक मोठ्या संख्येने उपस्थित होते.