लवकरच विजयी गुलाल! – समशेरसिंह नाईक निंबाळकर यांचे कार्यकर्त्याचे स्टेटस चर्चेत

फलटण प्रतिनिधी : 

फलटण नगराध्यक्ष पदाच्या निवडणुकीच्या पार्श्वभूमीवर राजकीय वातावरण तापू लागले आहे. सोशल मीडियावर एका पोस्टने सध्या मोठी खळबळ उडवली आहे. समशेरसिंह नाईक निंबाळकर यांचे समर्थक निष्ठावंत युवा कार्यकर्ते शरद दीक्षित यांनी आपल्या सोशल मीडिया स्टेटसवर “लवकरच विजयी गुलाल...” असे लिहून टाकत राजकीय चर्चेला तोंड फोडले आहे.

शरद दीक्षित यांच्या या स्टेटसमुळे राजकीय वर्तुळात उत्सुकता निर्माण झाली आहे. कार्यकर्त्याचा हा संदेश आगामी निवडणुकीत खासदार गटाकडून आत्मविश्वास दाखवणारा मानला जात आहे. नगराध्यक्षपदासाठी खुल्या प्रवर्गात पुन्हा दोन निंबाळकर आमनेसामने येण्याची शक्यता असल्याने हा स्टेटस अधिकच अर्थपूर्ण ठरत आहे.

दरम्यान, विरोधकांकडून या पोस्टकडे ‘राजकीय शो ऑफ’ म्हणून पाहिले जात असले, तरी समर्थकांमध्ये उत्साहाचे वातावरण आहे. सोशल मीडियावर ही पोस्ट मोठ्या प्रमाणावर शेअर केली जात असून, “फलटणमध्ये समशेरसिंह निंबाळकरांचा झेंडा फडकणार” अशा प्रतिक्रिया उमटताना दिसत आहेत.

फलटणमध्ये निवडणुकीपूर्व राजकीय शर्यत आता रंग घेऊ लागली आहे, आणि “विजयी गुलाल” या वाक्याने त्यात रंगत आणली आहे.