समशेरसिंह नाईक निंबाळकर यांचा मतदारांच्या गाठीभेटींवर भर

फलटण प्रतिनिधी :

नगराध्यक्ष पदाचे भाजपा - राष्ट्रवादी काँग्रेस अजित पवार पक्षाचे उमेदवार समशेरसिंह नाईक निंबाळकर यांनी निवडणूक प्रचारात मतदारांच्या थेट गाठीभेटींवर विशेष भर दिला असून प्रभाग क्रमांक १३ मध्ये त्यांनी जनसंपर्क साधला. घरोघरी जाऊन नागरिकांशी संवाद साधत त्यांच्या समस्या, अपेक्षा व सूचनांचा त्यांनी आढावा घेतला.

यावेळी जिल्हा परिषदेच्या माजी सदस्या सौ. जिजामाला रणजितसिंह नाईक निंबाळकर, जेष्ठ नगरसेवक सुदामआप्पा मांढरे, जयकुमार शिंदे, अमोल सस्ते यांच्यासह उमेदवार राहुल निंबाळकर,सौ. रुपाली अमोल सस्ते, मोहिनी मंगेश हेंद्रे यासह कार्यकर्ते मोठया संख्येने सहभागी झाले होते.

पाणीपुरवठा, स्वच्छता, रस्ते, वीजपुरवठा तसेच मूलभूत नागरी सुविधांबाबत मतदारांनी व्यक्त केलेल्या अडचणी समशेरसिंह नाईक निंबाळकर यांनी लक्षपूर्वक ऐकून घेतल्या. “निवडून आल्यानंतर नव्हे तर निवडणुकीपूर्वीच नागरिकांचे प्रश्न समजून घेणे गरजेचे आहे,” असे त्यांनी यावेळी सांगितले.

प्रभाग १३ मधील नागरिकांनी त्यांच्या भेटींना सकारात्मक प्रतिसाद दिला असून अनुभवी, कामकाज जाणणारा आणि सर्वसामान्यांच्या प्रश्नांशी जोडलेला उमेदवार अशी भावना अनेक मतदारांनी व्यक्त केली. या गाठीभेटींमुळे प्रभागात उत्साहाचे वातावरण निर्माण झाले आहे.