पंकजा मुंडे यांची शिवशक्ती परिक्रमा यात्रेचे फलटण येथे स्वागत : यात्रेत चोरट्याचा धुमाकूळ

फलटण प्रतिनीधी : भाजप नेत्या माजी मंत्री पंकजा मुंडे यांची शिवशक्ती परिक्रमा यात्रा आज फलटण येथे आली. यावेळी त्यांच्या स्वागतासाठी भाजप कार्यकर्त्यांनी मोठी गर्दी केली होती. यावेळी मोठा पोलिस बंदोबस्त असताना सुद्धा जमलेल्या गर्दीचा फायदा घेत अज्ञात चोरट्याने तीन जणांच्या गळ्यातील जवळपास साडे पंधरा तोळ्याचे दागिने लंपास केले.

आज फलटण शहरामध्ये पंकजा मुंडे यांच्या राज्यात सुरू असलेल्या शिवशक्ती परिक्रमा यात्रेचे आगमन होताच क्रांतिसिंह नाना पाटील चौकात भाजपच्या कार्यकर्त्यांच्या वतीने जंगी स्वागत करण्यात आले. पंकजा मुंडे यांचा ताफा थांबतात कार्यकर्त्यांनी त्यांच्या गाडीभोवती गर्दी केली. गर्दीचा फायदा उचलत अज्ञात चोरट्याने भाजपा डॉक्टर सेलचे फलटण शहराध्यक्ष डॉक्टर सुभाष गुळवे यांच्या गळ्यातील चार तोळ्याची सोन्याची चेन, सांगवी (फलटण) महादेव कदम यांची तब्बल साडेदहा तोळ्याची चेन, पत्रकार पोपटराव मिंड यांची एक तोळ्याची चेन हातोहात लंपास केली.

काही वेळाने संबंधिताच्या लक्षात ही बाब आली. यावेळी त्यांनी पोलिसांना झालेल्या चोरीची कल्पना दिली मात्र अज्ञात चोरटा घटनास्थळी सापडला नाही. यावेळी उपस्थित काही कार्यकर्त्यांनी काढलेले फोटो तसेच व्हिडिओ, सीसीटीव्ही फुटेज तपासण्याचे काम पोलिसांनी सुरू केले असून यावेळी झालेल्या चोरीची फलटण तालुक्यात चर्चा रंगली होती.