रामराजेंच्या इंस्टाग्रामवरून अनिकेतराजेंचे प्रमोशन

फलटणच्या राजकारणात पुन्हा एकदा सोशल मीडियाच्या माध्यमातून नवा राजकीय संदेश दिला गेल्याचे स्पष्ट झाले आहे. आमदार श्रीमंत रामराजे नाईक निंबाळकर यांच्या अधिकृत इंस्टाग्राम अकाउंटवरून अनिकेत राजेंचे फोटो आणि विकासकामांशी संबंधित प्रमोशनल पोस्ट्स दिसू लागल्याने, नगराध्यक्ष पदाच्या निवडणुकीसाठी रामराजेंचा कल अनिकेतराजेंकडे असल्याची चर्चा जोर धरत आहे.

सोशल मीडिया – नव्या राजकारणाचे रणांगणपूर्वी राजकीय निर्णय सभा, मेळावे किंवा जाहीर निवेदनातून होत असत; परंतु आता इंस्टाग्राम आणि फेसबुक, व्हाट्सअप हेच संकेत देणारे मंच झाले आहेत. रामराजेंच्या सोशल मीडियावरून अनिकेत राजेंची सातत्याने दिसणारी उपस्थिती, ही केवळ प्रचारात्मक कृती नसून, आगामी उमेदवारीबाबतचा राजकीय संदेश असल्याचे विश्लेषकांचे मत आहे.

पार्श्वभूमी : निंबाळकर विरुद्ध निंबाळकर

फलटण नगराध्यक्षपदाच्या लढतीत यंदा अनिकेतराजे विरुद्ध समशेरसिंह निंबाळकर अशी लढत रंगण्याची शक्यता आहे. दोन्ही नेते स्थानिक पातळीवर प्रभावी असून दोघांचे राजकीय गट सक्रिय झाले आहेत. मात्र रामराजेंच्या सोशल मीडियावरील हालचालींनी समशेरसिंह निंबाळकर यांच्या गटावर दबाव वाढवला आहे.

निवडणूक समीकरणे

नगराध्यक्षपद खुले असल्यामुळे, स्थानिक नेत्यांसाठी ही निवडणूक प्रतिष्ठेची ठरणार आहे. रामराजेंचा खुला पाठिंबा मिळाल्यास अनिकेत राजेंची स्थिती अधिक मजबूत होईल, तर दुसरीकडे विरोधकांनी "पक्षीय नव्हे तर स्थानिक स्वाभिमानाची लढत" म्हणून रणनीती आखण्यास सुरुवात केली आहे. 

फलटणचे राजकारण नेहमीच व्यक्तीनिष्ठ राहिले आहे. त्यामुळे सोशल मीडियावरील हालचालींनाही मतदार गांभीर्याने घेतात. रामराजेंनी अनिकेत राजेंचा प्रचार पुढे आणल्याने स्थानिक नेतृत्वात एकसंघता साधण्याचा प्रयत्न दिसतो नव्या पिढीच्या नेतृत्वाला प्रोत्साहन देण्याचा संदेश दिला जातो आणि विरोधकांसाठी ही पूर्वसूचना ठरू शकते की, या वेळेस निवडणूक केवळ नगरपालिकेपुरती मर्यादित राहणार नाही.

संपूर्ण घटनाक्रमावर राजकीय जाणकार बारीक लक्ष ठेवून आहेत. अधिकृत उमेदवारीची घोषणा अद्याप झालेली नसली तरी फलटणमधील राजकीय वातावरण आता तापू लागले आहे. दरम्यान, फलटण नगरपालिकेच्या आगामी निवडणुकीसाठी प्रचारयंत्रणा वेग घेऊ लागली आहे. सोशल मीडियावरील हा राजकीय प्रचार नवीन पिढीच्या नेतृत्वाला गती देणारा संकेत असल्याचे काही राजकीय जाणकारांचे मत आहे.